Ádilbekti syılaımyn, al rıngte jaqsy qarsylas bolamyz – Álimhanuly

Pavlodar qalasynda Bokstan Qazaqstan chempıonatynyń 5-shi kúni artta qaldy. Bul kúni sharshy alańǵa 52, 56, 60, 64, 69, 75, 81 jáne 91 kg salmaq dárejesindegi boksshylar shyǵyp, jartylaı fınaldyń joldamalaryn sarapqa saldy, dep habarlady QazAqparat. Rıo-de-Janeıro Olımpıadasynan kelgennen keıin, 75 keli salmaqtan 81 kelige aýysqan Jánibek Álimhanuly shırek fınaldyq básekesin merziminen buryn aıaqtap, tilshilerge bergen suhbatynda kásipqoı boksqa aýysý máselesi el birinshiliginen keıin belgili bolatynyn aıtty. «Jańa salmaq maǵan asa bir qıyndyq týdyryp jatqan joq. Bul salmaqqa da jaqsy daıyndyqpen keldim. О́zderińiz bilesizder, 81 keli salmaqta osyǵan deıin Olımpıadanyń eki dúrkin kúmis júldegeri Ádilbek Nııazymbetov óner kórsetip keldi. Ol Rıoda júldeger bolǵany úshin el birinshiliginen bosatylǵan. Men Ádilbekti aǵa retinde óte qatty syılaımyn. Al rıngte jolyǵyp jatsaq, bir-birimizge jaqsy qarsylas bolatynymyzǵa da senem. Al kásipqoı boksqa aýysý máselesi el birinshiligi aıaqtalǵan soń baryp, belgili bolady. Dál búgin, erteń eshnárse aıta almaımyn», – dedi Jánibek Álimhanuly. Esterińizge sala keteıik, Pavlodarda ótip jatqan el birinshiligi 27 qarasha kúni óz máresine jetedi. Úzdik shyqqan boksshylar ulttyq quramaǵa qabyldanady.