Búgin «Egemen Qazaqstan» gazetiniń redaksııasynda jazýshy Ábish Kekilbaevtyń maqalalary jınaqtalǵan jańa kitaptyń tusaýy kesilip, qalamgerdi eske alýǵa arnalǵan dóńgelek ústel ótti.
Alashtyń abyzy Ábish Kekilbaev dúnıe salǵaly da jyl bolyp qaldy. Jaqsynyń bary bilinbeıdi, joǵy bilinedi. Sońynda qalǵan qalyń eli ordadaı ornyn oısyratpaýǵa baryn salyp-aq jatyr. Baıtaq Qazaqııanyń batys pen shyǵysy arasyn Ábish álemine úńiltip, Ábish tereńine boılatýǵa talpynǵan ne bir aıtýly sharalar ótýde. Sonyń biri búgin elimizdiń bas basylymy «Egemen Qazaqstan» gazeti tórinde boldy.
Tyń bastama. Budan bylaı «Egemen Qazaqstan» kitaphanasy serııasymen ǵasyrlyq tarıhqa ıe basylymnyń betinde jarııalanǵan tulǵalarymyzdyń zamana lebi, dáýir tynysyn dál basqan, mazmun-maǵynasy ýaqyttyń daýyly men jaýynyna shaıylyp ketpeıtin biregeı shyǵarmalary jeke kitap bolyp jaryqqa shyǵyp otyrmaq. Bul bastama Qazaqstannyń halyq jazýshysy, Eńbek Eri, kezinde ózi de «Egemen Qazaqstan» gazetinde basshysy bolyp qyzmet etken Ábish Kekilbaevpen bastaldy.
Kenjeǵalı Saǵadıev, Qoıshyǵara Salǵara, Qajyǵalı Muhambetqalı, Tólen Ábdik, Saýytbek Abdrahmanov, Nesipbek Aıtuly, Zeınolla Alshynbaev sııaqty qabyrǵaly qalamgerler jáne Ábish aǵamyzdyń jary Klara apamyz qatysqan bul jınalys alqa-qotan otyrys, emen-jarqyn áńgime sıpatynda órbidi. «Egemen Qazaqstan» gazetiniń basshysy Darhan Qydyráli jıylǵan qaýymǵa «Dáýir daýysy» dep atalatyn jańa kitap jóninde sóz bastady. «Biz bul kitapqa Ábish aǵanyń basqa jaqqa shyqpaǵan, 1990-2015 jyldar aralyǵynda tek osy «Egemende» jaryq kórgen maqalalaryn engizip otyrmyz. Osy basylym betterine memlekettik úlken qyzmetterdi atqara júrip qoly qalt etkende jazǵan 144 maqalasy jaryq kórgen eken. Olardyń jalpy kólemi 1500-ge jýyq betti qurady. Biz solardyń arasynan iriktep, osy jınaqty daıyndadyq» dedi Darhan Qydyráli.
Ary qaraı qalamgerlerge sóz berildi. «Keıde bir shyǵarmashylyq ıesi týraly aıtarda «endi munyń nesin» aıtam dep oılanyp qalatyn kezder bolady, al, Ábish týraly kımelep kelgen kóp oıdyń qaısysynan bastaryńdy bilmeı abdyrap qalasyń» degen jazýshy Qajyǵalı Muhambetqalı jazýshynyń ensıklopedııalyq keń bilimi jaıyn sóz etti. Kekilbaevtyń bilimdarlyǵyna keńirek toqtalǵan Saýytbek Ábdrahmanov álem ádebıetinen qazaq tiline aýdarý jóninde Ábishpen keńeskeni týraly estelikter aıta kelip, «Tipti, Býnın Qalıhan Ysqaqtyń oń jambasyna keledi degen sekildi, qaı avtordy kimniń aýdarǵany ońdy bolatynyna deıin táptishteı aıtqanda eriksiz tańǵalǵan edik» dedi.
Al jazýshy Tólen Ábdik bolsa Kekilbaevtyń kórkem shyǵarmadaǵy ózgeshe orny jaıynda sóz qozǵady. «Keıde tipti tarıhı taqyryptar kedergi bolǵandaı kórinedi. Onda kórkem shyǵarmadaǵydaı erkindik joq qoı, tarıhtyń sorabymen júresiń. Degenmen ony da Ábish ózgeshe alyp shyqty» deı kele, «Ábishti áýlıe dedik qoı, ol shyn áýlıe. Onyń áýlıeligi tazalyǵynda, kisiliginde» dep ony ádemi esteliktermen kómkerdi.
Qoıshyǵara Salǵara Aqseleý Seıdimbek ekeýiniń «Qazaqqa osy kezde tanymdyq dúnıe kerek» dep kórkem ádebıetti qoıa turyp tarıhı, tanymdyq dúnıelege qalam terbegeni, sol oraıda ózine Ábishtiń jol ashqany týraly estelik aıtty. «Ábish «malym janymnyń, janym arymnyń sadaǵasy» deıtin degdar halyqtyń qalaı qaraqan basynyń qamynan aspaıtyn qul-qutanǵa aınalǵanyn ishten kórdi, ishten bildi. Onyń halyqtyq qasıetine qaıtýyna búkil kúsh-jigerin arnady» dep túıdi.
Nesipbek Aıtuly aǵamyz Ábishke arnap qysqa ǵana óleń oqydy. Qasynda otyrǵan Tólen aǵamyz «Serik Turǵynbek úsh shýmaq óleń oqyrdyń aldynda jarty saǵat sóılep alýshy edi, sen jaqsy jigit ekensiń» dep ázildep jurtty dý kúldirip aldy.
Iá, báriniń de qazaqtyń Ábishine aıtary taýsylar emes. Aǵylyp aıtyp jatyr. Kenjeǵalı Saǵadıev pen Klara apamyz kitaptyń tusaýkeser yrymyn jasady. Osy oraıda gazet basshysy «Egemen Qazaqstan» gazetiniń Ábish Kekilbaev atyndaǵy shákirtaqy taǵaıyndaǵanyn jetkizdi.
Klara apamyz «Ábish dúnıeden ótkenmen el-jurty, azamattar osyndaı is-shara atqaryp jatqanda jalǵyzsyramaıdy ekensiń» degen júrekjardy sózin aıtty.
Otyrys sońynda qonaqtar «Egemen Qazaqstannyń» jańa kitaphanasynda klassık jazýshynyń murasyna arnalǵan múıisti tamashalap tarqasty.
Ularbek Nurǵalymuly, «Egemen Qazaqstan»
