Qundy qujattar sóıleıdi

«Táýelsizdik Týy astynda». Keshe Syrtqy ister mınıstrliginde Táýelsizdiktiń 25 jyldyq mereıtoıyna oraı ashylǵan tarıhı-derekti kórme osylaı dep atalady. Onyń ótýine syrtqy saıasat vedomstvosy men Qazaqstan Respýblıkasy Prezıdentiniń Muraǵaty uıytqy boldy. Is-sharanyń ashylýynan keıin BAQ ókilderine arnalǵan brı­fıngte Syrtqy ister mınıstriniń orynbasary Roman Vasılenko shırek ǵasyr ishinde Qazaqstannyń memleket retindegi qalyptasý kezeńderin, qol jetkizgen jetistik­terin aıqyndaıtyn qundy qujattar men fotosýretter qoıylǵan kór­meniń mańyzyn atap ótti. Son­daı-aq, ol: «Bul rette, men eń aldy­men, Qazaqstan Respýblıkasy Prezıdenti Muraǵatynyń dırek­tory Borıs Japarovqa, muraǵat qyz­metkerlerine osyndaı ıgi sharany ótkizý úshin úlken nıettes­tik tanytqany, jurt nazaryna usy­nylǵan qujattar tóńireginde úlken zertteý jumys­taryn júrgizgeni úshin rızashy­lyǵymdy bildirgim keledi», – dedi. Borıs Japarov Táýelsizdik jyldary memleket aldyna úlken mindetter qoıylǵanyn, ol mindetterdi sheshý, ekonomıkany turaqtandyrý, alǵa qaraı damytý naqty demokratııa men naryqtyq qatynastarǵa negizdelýimen erekshe­lengenin jetkizdi. «Qazaqstan óz Táýelsizdigin jarııalaǵan kúnnen bastap, halyqaralyq uıymdarǵa óz erkimen múshe bolý múmkindigin aldy. 1992 jyldyń 30 qańtarynda Eýropadaǵy Qaýipsizdik jáne ynty­maqtastyq uıymyna múshe­likke ótti. Al 1992 jyldyń 2 naýry­zynda elimiz BUU-nyń tolyq­qandy múshesi boldy. 1993 jyl­dyń qazan aıynda Qazaqstan Eko­no­mıkalyq yntymaqtastyq uıy­myna, 1994 jyldyń 24 mamyryn­da arnaıy qujatqa qol qoıa oty­ryp, NATO-nyń «Beıbitshilik jónindegi áriptestigi» uıymynyń 19-shy múshesi boldy. Jalpy, XX ǵasyrdyń sońyndaǵy tarıhı kezeńde Qazaqstan adamzattyń, jalpy dúnıeniń qasiretine aı­nal­ǵan Semeı ıadrolyq synaq alań­daryn jabý, Keńes Odaǵynyń en­shi­sinen ótken ıadrolyq qarýlar men onyń jetkizý quraldarynan óz erkimen bas tartý arqyly álemge beıbitsúıgish memleket retinde tanyldy», – dedi Borıs Japarov. Sonymen qatar, ol elimizdiń derbes memleket retinde qalyptasýy men halyqaralyq qaýymdastyqta jetken jetisteriniń tarıhy Qazaq­stan Respýblıkasy Prezıdenti Mura­ǵatynyń qor­larynda saqtal­ǵan qujattarda tolyqtaı kór­setil­genin aıtty. «Onda resmı-hro­­nıkalyq qujattarmen qatar, saıası jáne qoǵamdyq uıymdardyń materıaldary, Táýelsizdik kezeńi­niń merzimdi basylymdary da bar. Sizderdiń nazarlaryńyzǵa «Táýel­sizdik Týy astynda» degen taqyryppen usynylyp otyr­ǵan kórmede Táýelsizdik alǵan jyldar­dan bastaý alatyn memleket­tilik­tiń qalyptasý tarıhyn tolyq ashyp kórsetetin qujattar ornalas­tyryl­dy», – dedi ol óz sózinde. Al Parlament Májilisiniń depý­taty Muhtar Erman: «Bul – bire­geı qujattardyń kórmesi. Ár qujat­tyń orny bólek. Sebebi, olardyń árqaısysynyń artynda elimiz ben qoǵamymyzdyń damýy, ósýi, qazaq dıplomatııasynyń syrt­qy álemdegi orny men róli tur. En­deshe, mundaı qundy dúnıelerdiń jurt­shylyqqa berer taǵylymy da orasan bolady dep oılaımyn», – dedi. Kórme 5 bólikten turady. Olar­da Qazaqstannyń Memlekettik nyshan­dary, Qazaqstannyń Tuńǵysh Prezı­denti, el Parlamenti, Úki­meti, Ulttyq valıýtanyń aına­lym­ǵa enýi, Qazaqstan halqy Assam­b­­leıasynyń, syrtqy saıası vedom­stvonyń qurylýy, dıplo­ma­tııa­lyq baılanystardyń or­naýy, Qazaqstannyń BUU-ǵa qabyl­­danýy, sondaı-aq, elimizdiń shet mem­le­kettermen saıası-ekonomı­kalyq baılanys ornatýy týraly qundy materıaldar, Qazaqstan Prezı­dentiniń túrli sheteldik áriptes­terimen suhbattary jáne halyq­aralyq jıyndarda jasaǵan baıan­damalary, Prezıdent Jarlyqtary, shet memleket basshylarynyń eli­miz­di Táýelsiz memleket retinde tanýy týraly hattary qoıylǵan. Láıla EDILQYZY, «Egemen Qazaqstan» Sýretti túsirgen Orynbaı BALMURAT, «Egemen Qazaqstan»