Reforma sátimen júrgizilýde

Keshe Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttiginde Almaty qalasy boıynsha memlekettik qyzmet isteri jáne sybaılas jemqorlyqqa qarsy is-qımyl departamentiniń dırektory Aıgúl Baıhanovanyń qatysýymen Bes ınstıtýttyq reformanyń «Kásibı memlekettik apparat qurý» atty birinshi baǵytyn júzege asyrý boıynsha brıfıng ótti. Departament dırektorynyń máli­metine qaraǵanda, Almaty qalasynda ústimizdegi jylda 241 konkýrs ótkizilip, oǵan 207 baıqaýshy qatysqan. Bul rette merıtokratııa qaǵıdasy boıynsha 134 memlekettik qyzmetshi joǵary laýazymdarǵa ıe bolǵandyǵyn aıta ketý kerek. Jáne de jańadan ákim­shilik memqyzmetke qabyldanǵandar­dyń qatary 294 adam bolsa, memleket­tik qyzmetterin toqtatqannan keıin qaıta taǵaıyndalǵandar sany 169-ǵa jetken. Qazirgi tańda olardyń bar­lyǵyna tálimgerler bekitilip beril­gen. A.Baıhanova­nyń aıtýynsha, toq­san saıyn ákimshilik memlekettik qyz­metshilerdiń qyzmetin baǵalaý júr­giziledi. Keltiril­gen málimetterge qaraǵanda, úshinshi toqsann­yń qory­tyndysy boıynsha jumysy «óte jaqsy» dep tabylǵan­dardyń qatary 18 paıyz, al «tıimdi» sanalǵandardyń deni 73 paıyz jáne «qanaǵattanar­lyq» dep tabylǵandar 9 paıyz bolyp otyr. Sondaı-aq, jańa Ádep kodeksi normalarynyń buzylýyna da departament erekshe nazar aýdarýda. Tarqatyp aıtqanda, ádep norma­laryn saqtamaǵany úshin 4 memleket­tik qyzmetshi jaýapqa tartylsa, bul jal­py jaýapqa tartylǵandardyń 7 paıyzyn quraıdy. A.Baıhanova sóz reti kelgende jańa reforma halyqaralyq jáne otan­dyq sarapshylar tarapynan joǵary baǵasyn alǵandyǵyn ortaǵa saldy. Qazaqstan strategııalyq ınstıtýtynyń zertteý­leri kórsetkendeı, suraý salynǵandar­dyń 80 paıyzy atalǵan reforma­ny qoldaıtyndyqtaryn bildirgen. Jańa modeldiń ómirge kelýi memlekettik qyz­metshilerdiń laýazymdyq ósýine úl­ken múmkindik berip otyr. Ústimizdegi jyly Almaty qalasynda 4300 adam testke qatysqan. Olardyń 45 paıyzy belgilengen deńgeıdi eńserse, bul ótken jyldyń osy merzimimen salystyrǵanda 52 pa­ıyzǵa artyq. Bir orynǵa konkýrsqa túsýshiler sany eki esege artqany málim boldy. Departament dırektory Almaty qalasynyń barlyq 201 mektep mekemelerinde «Adal Urpaq» klýbtary qurylǵandyǵynan da habardar etti. Asqar TURAPBAIULY, «Egemen Qazaqstan»