Qostanaı oblystyq «Qoǵamdyq kelisim» úıinde «Etnosaralyq qatynastardyń ózekti problemalary: qazirgi jaǵdaıy jáne bolashaǵy» (Qostanaı oblysynyń materıaldary boıynsha) atty ujymdyq monografııanyń tusaýkeseri ótti. Bul eńbek jaqynda Astanada ótken Qazaqstan halqy Assambleıasy Ǵylymı-sarapshylyq keńesiniń Qazaqstan Respýblıkasy Táýelsizdiginiń 25 jyldyǵy merekesine oraı jarııalaǵan baıqaýynda bas júldege ıe bolǵan edi. Tusaýkeserge oblys ortalyǵyndaǵy zııaly qaýym jáne ulttyq-mádenı ortalyqtardyń ókilderi men monografııa avtorlary qatysty.
Basqosýda Qazaqstan halqy oblystyq assambleıasy ǵylymı-saraptama tobynyń tóraǵasy, zań ǵylymdarynyń kandıdaty Álimjan Bekmaǵambetov jaqynda ǵana elimiz Parlamenti qabyldaǵan Qazaqstan Respýblıkasy Táýelsizdiginiń 25 jyldyǵyna arnalǵan Deklarasııa týraly aıtyp berdi.
«Elimiz Táýelsizdigin alǵannan bergi 25 jylda Elbasy Nursultan Nazarbaevtyń basshylyǵymen elimiz jetken jetistiktiń negizi bereke-birligimizde jatyr. Deklarasııada osy oı naqty ári ádil kórsetilgen. Bizdiń ǵylymı sarapshylar jazǵan monografııanyń da kózdegen maqsaty elimizdegi tynyshtyq, qatyqtaı uıyǵan birlik», - dedi Álimjan Baýyrjanuly.
Monografııaǵa atsalysqan avtorlar maqalalarynyń barlyǵy derlik ǵylymı salmaǵymen erekshelenedi. Kópshilikke arnalǵan kitaptyń etnosaıası salada oqyrmanǵa bereri mol.
Munan keıin monografııa týraly jınalǵandar pikirlerin ortaǵa saldy. Kitap ázirge 500 danamen shyqty. Aldaǵy ýaqytta ol qarjyǵa qaraı kóbeıtilip, oblys kitaphanalaryna, oqý oryndaryna taratylady.
Názıra Járimbetova,
"Egemen Qazaqstan".
