Elimniń keleshegin elestettim

Táýelsizdiktiń týyn tikkenimizge de shırek ǵasyrdyń shamasy bolypty. Qazaǵymnyń yqylym zamannan arman etken azattyǵyn alǵan kezden bastap búgingi kúnge deıingi jetken deńgeıimiz ben dárejemizdi saralar bolsaq, eń aldymen Esildiń boıynan eńseli Astana salǵanymyzdy aýyzǵa alýǵa bolady. Álbette, búgingi kún turǵysynan alyp qa­ra­ǵanda, bul ózi zamannyń yńǵaıy hám ýa­qyttyń talaby boıynsha dúnıege kele salǵan ke­re­mettiń biri sııaqty bolyp kórinýi múmkin. Al shyn mánisinde, munyń astaryna úńiler bolsaq, ta­rıhta asa sırek kezdesetin aqyl-oı, arman-maq­sattardyń taý qoparyp, qamal alǵannan da zor kúsh-qýatynan týyndaǵan teńdessiz joba eke­nin túısinesiz. Mine, osyndaı uly isterdiń bas­taýynda uıytqy bolyp Nursultan Ábishuly Nazarbaevtaı nar tulǵanyń turýy tarıhtyń biz­ge tartqan ǵalamat syıy ekenin qalaısha aıtpasqa?! Elbasynyń «Egemen Qazaqstan» gazetinde jarııalanǵan «Uly dala ulaǵattary» eńbeginiń «Eńsesi bıik elorda» atty bólimin oqyp shyq­qa­nym­da, osydan birneshe jyl burynǵy buıyǵyp jat­qan shaǵyn ǵana qala Aqmolaǵa aǵylǵan kóshti eske aldym. Jasyratyny joq, sol kezde Tuńǵysh Prezıdenttiń suńǵyla saıasatyna tereń boılaǵanymyz, nartáýekelge bel býǵan kózsiz batyrlyǵyna kúmánsiz qaraǵanymyz kemde-kem edi. Sóıtsek, eldiń erteńin oılaǵan kemeńger biz tómende kúńkildep júrgendeı bolǵan shaqta qol jetpes bıikterden bolashaqqa kóz tigip, bárin de boljap-bilip otyrǵan eken ǵoı. «Búgingi jahandaný shaǵynda jańa qala salý­dyń máselesi asa qıyndyq týǵyzbaıdy. Ne kerektiń bári de bar. Rasynda solaı ma? Asy­ǵys oılasań, ońaı sekildi kórinip ketetin is­tiń artynda úlken problemalar týyndap shy­ǵa keledi. Qala salý túgili, úı salýdyń da ma­shaqatyn bala kezden kórip ósken urpaqtyń óki­limiz», dep jazady Elbasy kitabynda. Ras-aý, bir úıdi salýdyń ózi bútin bir áýletti áýre-sarsańǵa salyp qoıatynyn bilemiz, talaı már­te kýási de boldyq. Al aıaǵynan endi qaz tura bastaǵan eldiń zamannyń qıyn-qystaý ýa­qytynda bas qalasyn turǵyzýy – tarıhtan izde­seń tappaıtyn mysaldyń biri. Kitapty oqı otyryp shyǵarmanyń ón­boıy­nan Astananyń aıshyǵyn, elimniń aıbynyn tanytatyndaı rýhty ekpin men qýatty oı tas­qynyn sezinesiń. Qazaqstan degen eldiń eńse tik­tep, endigide keleshekke qyransha kóz tikken bol­mys-bitimin tanısyń! «Qylysh pen naızanyń zamany ótti. Zirkil­de­gen zeńbirekterińizdiń ózi qazir qarý-jaraq mu­rajaıynda tur. Qazirgi rýhty sóz – ulttyń ta­­nymyn da, tarıhyn da tolǵaıtyn sóz «Máń­gi­lik El» bolýy kerek. Bul sóz halyqtyń óz kóki­reginen shyǵyp, ár adamnyń júrekjardy só­zi­ne aınalýy qajet, sonda ǵana uly maqsat ózi­niń mejeli bıigine shyǵady», dep jazǵan Ult kóshbasshysynyń sózine alyp-qosarymyz joq. Boranbaı JUMKEULY, eńbek ardageri, «Qurmet» ordeniniń ıegeri, Shet aýdanynyń qurmetti azamaty   Qaraǵandy oblysy