Jambyl oblysynda altyn óndirý tehnologııasy bar zaýyt salynady

Germanııanyń «Aurum Deutschland AG» (Aýrým Doıchland AG) kompanııasy Qordaı aýdanyndaǵy ken ornyna arnaıy ázirlengen altyn óndirýdiń biregeı tehnologııasyn paıdalanýdy josparlaýda, dep habarlady QazAqparat. Tarazda ótken Taraz Invest – «AgroChemical Day 2016» ınvestforýmynda Jambyl oblysynyń ákimi men «Aurum Deutschland AG» kompanııasy arasynda taý-metallýrgııalyq kombınattyń qurylysy týraly memorandýmǵa qol qoıyldy. Qordaı aýdanynda taý-ken kombınatyn turǵyzý jáne altyn kenin baıytý týraly kelisimge Jambyl oblysynyń ákimi Kárim Kókirekbaev pen «Aurum Deutschland AG» JShS bas dırektory Iogan Shtol qol qoıdy. Maıbulaq altyn ken ornyndaǵy zaýyttyń josparlanǵan jyldyq qýaty – 5-6 tonna. Qurylystyń quny shamamen 250 mıllıon dollarǵa jetedi, al jobanyń jalpy quny - 300 mıllıon dollar, nemis kompanııasy óz aksııalarynyń 100% ıe.  Qordaı aýdanynda shamamen 900 jańa jumys orny ashylady. «Qazir Maıbulaq ken ornyn barlaý ústindemiz, - dep jalǵastyrdy kompanııa dırektory. - Biz oǵan 30 mıllıon dollar qarjy saldyq, úsh jylda bitiremiz degen oıdamyz. Qazir jobalyq jumystar júrip jatyr, olardy áli de qorǵap shyǵý kerek. Sonda, shamamen bir jarym jyldan soń zaýyt qurylysyn bastaımyz. Altyndy óndirý júıesi jańa germanııalyq tehnologııamen júzege asady, ol áli álemde joq, alǵash ret osy jerde synap kóremiz. Júıe ázirlenip daıyn tur, biz altynmen birge ózge de metalldar shyǵatyn Qordaı aýdanynyń ken ornyna arnalǵan tehnologııany ázirleý úshin 12 mıllıon eýro jumsadyq», – dedi Iogan Shtol.