Úleskerlerge senimdi kepildik beriledi

Qazaqstanda úleskerlerdiń quqyǵyn qorǵaıtyn turǵyn úı qurylysyna kepildik berý tetigi qyzmet etedi. Bul týraly Ortalyq kommýnıkasııalar qyzmetinde ótken baspasóz konferensııasynda «Turǵyn úı qurylysyna kepildik berý qory» AQ basqarma tóraǵasy Dáýren Ońaev málim etti. «Qurylys salýshy jáne onyń ýákiletti kompanııasy Qor kepildigin ne jergilikti atqarýshy organnyń ruqsatyn almaıynsha qurylysqa úleskerlerdiń aqshasyn tarta almaıdy», – dedi D. Ońaev. Ol «Turǵyn úı qurylysyna úlestik qatysý týraly» Zańnyń kúshine enýine baılanysty qurylys salýshylarǵa qatal talaptar qoıylǵanyn atap ótti. Endi turǵyn úı qurylysyna úleskerlerdiń aqshasyn tartý úshin qurylys salýshy Astana jáne Almaty qalalarynda keminde úsh jyl jalpy aýdany 18 myń sharshy metr nemese basqa óńirlerde 9 myń sharshy metr turǵyn úı salǵan bolýy tıis. Budan basqa, qurylys salýshynyń sońǵy eki jylda shyǵynsyz qyzmeti bolýy qajet. Basqarma tóraǵasynyń aıtýynsha, Zań birneshe kepildik berý jaǵdaılaryn kózdeıdi, onyń birin iske asyrý barysynda Turǵyn úı qurylysyna kepildik berý qory turǵyn úı qurylysyn aıaqtaý jáne keıinnen úleskerlerge úlesterin berý boıynsha mindettemelerdi ózine alady. «Biz aldymyzǵa kepildik alǵan nysandar boıynsha úleskerlerdiń múddelerin qorǵaýdy qamtamasyz etýde tıimdi is-áreketter arqyly úleskerlerdiń senimin aqtaıtyn uıym bolýdy shart etip qoıamyz», – dedi D. Ońaev. Aıdar О́risbaev, "Egemen Qazaqstan".