Qazaqstan ýrbanızasııa deńgeıi boıynsha Ortalyq Azııada kósh bastap tur

Qazaqstan ýrbanızasııa deńgeıi boıynsha búginde Ortalyq Azııada kósh bastap tur. Bul týraly Astanada ótip jatqan halyqaralyq ASTEX Astana Smart City forým-kórmesi barysynda Aqparat jáne kommýnıkasııalar mınıstri Dáýren Abaev málimdedi. «Qazir qalalyq ómirdiń barlyq salalaryna aqparattyq júıelerdi endirý halyqtyń sapaly ómiriniń ajyramas shartyna aınalyp otyr. Dúnıe júzinde ýrbanızasııa prosesi damyp keledi. BUU-nyń málimetine sáıkes, 2050 jylǵa qaraı álemdegi halyqtyń 70 paıyzy qalalarda turatyn bolady. Bul óz kezeginde kólik jáne turǵyn úımen qamtý júıesinde qıyndyqtar týdyrady, sondaı-aq energııany ońtaıly paıdalaný men qorshaǵan ortaǵa qamqorlyq tanytýdyń ózektiligi artyp otyr. Mundaı qıyn máselelerdi sheshýde durys shara qoldanýymyz kerek», – dedi mınıstr. Onyń aıtýynsha, bul oraıda aqparattyq-kommýnıkasııalyq tehnologııalar sheshýshi ról atqarady. Damyǵan elder postındýstrııalyq dáýir qalalaryn damytý úshin bul múmkindikterdi tolyqqandy paıdalanýda. «Aqyldy energetıka», tipti «Qaldyqtardy aqyldy basqarý» sekildi sóz tirkesteri búginde eshkimdi tań qaldyrmaıdy. Halyqaralyq aqparattarǵa sáıkes, aqyldy qalalarda ınternet qurylǵylarǵa qosylǵan tutynýshylardyń sany 2015 jylǵy 1 mıllıonnan 2018 jyly 3 mıllıardqa jetedi», – dedi D.Abaev. «Jahandyq ekonomıka men tehnologııalyq naryqtan qalys qalmaý asa mańyzdy. Qazaqstanda ýrbanızasııa deńgeıi 60 paıyzǵa jetedi jáne osy kórsetkish boıynsha biz Ortalyq Azııada kósh bastadyq. Bul prosestiń jarqyn úlgisi bizdiń jas astanamyz bolyp otyr», – dep atap ótti ol.