Qytaı soty Shyńjań-Uıǵyr avtonomııalyq aýdanynyń tórt turǵynyn jappaı berekesizdik uıymdastyrǵandary úshin ólim jazasyna kesti. Sondaı-aq taǵy eki adamdy 19 jylǵa sottady.
«Nıý-Iork Taıms» basylymynyń jazýynsha, ólim jazasyna kesilgender men uzaq merzimge sottalǵan azamattar – osy eldegi uıǵyr etnosynyń ókilderi. Olar terrorlyq toptarǵa jetekshilik etti, adam óltirdi, zańsyz jarylǵysh zattar jasady degen baptar boıynsha isti bolǵan kórinedi. Búkilálemdik uıǵyr kongresiniń bas hatshysy Dolkýn Isa Qytaı sotynyń úkimin «bul qylmystyq jaza emes, saıası jaza» dep málimdegen.
EL TARIHYNDA TUŃǴYSh RET...
Danııada 15 qyrkúıekte ótken parlamenttik saılaýda solshyl «Qyzyldar blogy» men solshyl kúshter jeńiske jetti. DR teleradıo kompanııasynyń habarlaýynsha, solshyldar saılaýshylardyń 50,2 paıyz daýysyna ıe bolyp, el parlamentinen 89 oryn alǵan.
Eldegi asa iri partııalardyń biri – «Qyzyldar blogyn» sosıal-demokrattardyń jetekshisi Helle Tornıng-Shmıdt hanym basqarady. H.T.Shmıdt Danııa tarıhynda úkimet basqaratyn tuńǵysh áıel bolmaq. Al sońǵy on jyl boıy bılik basynda bolǵan lıberal-konservatorlar saılaýda 49,7 paıyz daýys alǵan.
ARDAGERGE 15 MILLION DOLLAR SYIAQY
Vetnam soǵysynyń ardageri, 63 jastaǵy Rıchard Ýest iri medısınalyq kompanııadaǵy alaıaqtyqty ashqany úshin 15 mıllıon dollar aldy. «Nıý-Iork post» gazetiniń aqparatyna qaraǵanda, dári-dármekti jıi paıdalanatyn ol medısına qyzmetkerleriniń qylmysyn birneshe jyl teksergen.
Tekserý barysynda múgedekter men materıaldyq jaǵynan az qamtylǵan otbasylar úshin dári-dármek satyp alýǵa bólingen qarjyǵa dári-dármek alynbaıtynyn anyqtaǵan. Advokat jaldaı otyryp, kompanııany sotqa berip, AQSh bıliginiń nazaryn aýdartypty. Nátıjesinde eldiń 40 shtatynda 300 ofısi bar Maxim medısınalyq kompanııasy zańsyz jolmen 61 mıllıon dollar tapqanyn moıyndaǵan. Osy alaıaqtyq áreketterdi ashqany úshin soǵys ardagerine 15 mıllıon dollar syıaqy berilipti.
UIYMDAǴY О́KILETTIGIN KEŃEITÝDI USYNADY
«Reıter» aqparat agenttiginiń habarlaýynsha, Eýropa Odaǵy Palestına ulttyq ákimshiliginiń basshylaryn óz táýelsizdigin jarııalaýdan bas tartýǵa kóndirgisi keledi. Oǵan balama retinde Eýropa Odaǵy Palestına ákimshiligine BUU-daǵy ókilettigin keńeıtýdi usynady.
Ázirlengen bul usynyspen Eýropa Odaǵynyń shet el isteri jónindegi joǵarǵy ókili Ketrın Eshton aınalysyp jatqan kórinedi. Keıbir málimetterge qaraǵanda, Palestına avtonomııasynyń BUU-ǵa tolyqqandy múshe bolýy jaıynda sóz bolyp jatqan joq. Qazirgi áńgime tek Palestınanyń BUU-daǵy mártebesin kóterý týraly ǵana syńaıly.
ÚSh QYRǴYZSTANDYQ DÝShANBEDE USTALDY
Dýshanbede Qyrǵyzstan prezıdenti ákimshiliginiń burynǵy basshysy Medet Sadyrqulovtyń ólimine qatysy bar degen kúdikpen Qyrǵyzstannyń birneshe azamaty ustaldy. Bul týraly «Azııa-plıýs» aqparat agenttigi habarlady.
Agenttiktiń taratqan aqparattaryna qaraǵanda, úsh adam – Kodırbek Dosonov, Shyńǵys Jumaǵulov jáne Marlan Shakýlıev ustalǵan. Qyrǵyzstan ishki ister mınıstriniń orynbasary M.Turǵanbaevtyń málimdeýinshe, joǵaryda atalǵandardyń biri – K.Dosonov Osh oblysyndaǵy yqpaldy qylmystyq toptyń basshysy bolǵan kórinedi. Qyrǵyzstan taraby Tájikstan ishki ister mınıstrligine ustalǵan azamattardy Qyrǵyzstanǵa ekstradısııalaý jóninde ótinish jasady.
MEShITTIŃ IMAMYN ATYP KETTI
Daǵystannyń Býınak aýdany Chankýrbe selosyndaǵy meshittiń ımamy óz úıinde atyp óltirilipti. «Novostı» aqparat agenttiginiń habarlaýynsha, qylmys 15 qyrkúıek kúni túnde jasalǵan.
Avtonomııa quqyq qorǵaý organdarynyń málimetteri boıynsha, ımamǵa avtomattan oq atylǵan. Imamnyń aty-jóni Zaınýdın Daızıev, 1984 jyly týǵan. Imam óliminiń astarynda dinı qyzmet jatqan sekildi. Jergilikti aqparat kózderiniń taratqan derekterine qaraǵanda, Z.Daızıev biraz jyldan beri Karmahı jáne Chabanmahı selolaryndaǵy vahabshyl qaýymnyń dinı áreketterine qarsy belsendi qımyl tanytyp kele jatqan kórinedi.
Qysqa qaıyryp aıtqanda:
«Evrosettiń» burynǵy vıse-prezıdenti Borıs Levın ózin negizsiz qylmystyq qýdalaǵany úshin memleketten 20 mıllıon rýbl alatyn boldy. Mundaı sheshimdi Máskeý qalalyq soty shyǵardy.
Túrkııa prezıdenti Abdýlla Gúl Germanııanyń vıza saıasatyna baılanysty syn aıtty. Munyń eki el arasyndaǵy tyǵyz qatynasqa salqynyn tıgizýi yqtımal.
Kemerov oblysynyń gýbernatory Aman Tóleev kommýnısterdiń partııalyq saıtynda jarııalanǵan eki jarııalanymdaǵy aqparattardy sotqa berip, moraldyq shyǵyn úshin 720 myń rýbl alatyn boldy.
AQSh-tyń memlekettik departamenti Sırııadaǵy óz azamattaryn shuǵyl túrde elden ketýge shaqyrdy. Oǵan Sırııadaǵy turaqsyzdyq sebep bolyp otyr.
Internet materıaldary negizinde ázirlendi.
