Is jandanyp, senim nyǵaıýda

Eńbek jáne halyqty áleý­mettik qorǵaý mınıstri Gúl­sha­ra Ábdihalyqova jumys saparymen Shortandy, Bulan­dy jáne Zerendi aýdandarynda bolyp, Elbasy N.Na­zar­baev­tyń «Bola­shaq­tyń irgesin birge qalaımyz!» atty bıylǵy Joldaýynan tý­yndaıtyn mindetterdi oryndaýǵa baǵyt­tal­ǵan «Jumyspen qam­tý-2020» baǵdarlamasynyń oryndalý barysymen ta­nysty. Shortandy aýdanyndaǵy ha­lyq­ty jumyspen qamtý orta­ly­ǵy ústimizdegi jyldyń 1 shildesinde ashylǵanyna qaramastan, edáýir nátıjelerge qol jetkizgeni atap ótildi. Baǵdarlama sheń­be­rinde 32 adam kásibı daıarlyqtan, 7 kisi qaıta daıarlyqtan ótip jatsa, 4 kisige joldama berilgen, al, 5 adam Astanadaǵy «Turan Profı» halyqaralyq kásiptik akade­mııasynda bıznes negizderi kýr­syn oıdaǵydaı bitirdi. Olardyń barlyǵy derlik jańa kásiptiń nápaqasyn terýde. Bulandy aýdanyndaǵy Danılov aýylynyń turǵyny Bekeı Hat­shybaı úsh bólmeli úıdi jalǵa alyp, ulttyq kıim úlgileri she­ber­hanasy men etikhana ashypty. Týǵan elge 1993 jyly oralǵan Be­keń Mońǵolııada tanymal qol­óner sheberi atanypty. Arnaıy bıznes kýrsynan ótken ol áıeli, eki qaryndasy jáne baýyry Qýa­nysh Nııazbekpen birge ulttyq naqyshtaǵy kıimderdi kelistirip tigetini oblysty bylaı qoıyp, Astana tutynýshylaryna da jaq­sy málim. Baǵdarlamanyń ekinshi baǵytyna kóshken Bekeı Hatshy­baı óz isin keńitý nıetinde. Jergilikti deń­geı­de barlyq másele she­shilgenimen, belgilengen 3 mıl­lıon teńge nesıe ońaı­lyq­pen qol­ǵa túsetin túri joq. Eń tómen­gi 100 eseptik kórsetkishtegi jar­ǵy­lyq jar­nany jınaǵanymen, aýyldyq jaǵ­daıda banktiń kóńi­linen shyǵatyndaı kepildik múlik tabylmaı tur. 190 shaqyrymdaǵy Novobrat aýylynan ádeıi kelgen shashtaraz Nadejda Valker de osy máseleni kóterdi. Máseleniń oryndylyǵyn atap kórsetken mı­nıstr bul baǵytta tıisti ju­mys­tar júrgizilip jatqanyn málimdedi. Baǵdarlamanyń «Eńbek re­sýrs­tary­nyń aýqymyn arttyrý» dep atalatyn úshinshi baǵyty boı­ynsha oblystaǵy 53 otbasy Aqkól, Atbasar, Býrabaı jáne Zerendi aýdandarynda tómen ba­ǵa­men jalǵa beriletin páter­ler­men qamta­ma­syz etiledi. Zerendige kelgen mınıstr G.Ábdi­ha­lyq­ova osy maqsatta salynǵan jańa 10 páterli turmysqa qolaıly úıdi aralap kórdi. Aýdan ákimi Erbol Saǵ­dıev bul kisilerdiń bar­lyǵy jumysqa ornalas­ty­ryl­ǵanyn jáne is jalǵasyn taý­yp jatqanyn aıtty. Máselen, ın­dýstrııalyq-ınnovasııalyq baǵyttaǵy Zerendi astyq qabyl­daý kásiporny men «Paryz» kon­kýrsynda «Úzdik áleý­mettik ká­siporyn» ataǵyn jeńip alǵan «Reın» seriktestigi sońǵy eki jylda 87 adamdy turaqty ju­mysqa orna­lastyrdy. – Jańa baǵdarlama elimizdegi óz kásibinen ıgilik kútken 50 myń­ǵa jýyq adamdy turaqty ju­myspen qamtýdy kózdeıdi, –  dedi mınıstr BAQ ókilderimen áń­gimede. – Aqmola oblysyna res­pýb­lıkalyq bıýdjetten 1 mıllıard 71 mıllıon teńge bólinip otyr. Memlekettik organdar ta­ra­pynan atqarylatyn mindet orasan. Bir ǵana mysal aıtaıyn. О́ńirdegi 150 adamǵa shaǵyn nesıe beriledi. Maqsat – qyrýar qar­jyny tıimdi jumsap, halyqtyń senimin arttyrý. Baqbergen AMALBEK, Aqmola oblysy.