Qos birdeı shara ótti

Jýyrda El Táýelsizdiginiń 20 jyl­dy­ǵy­na oraı Astanadaǵy ejelgi bilim orda­sy­nyń biri sanalatyn Qaztutynýodaǵynyń Saýda-ekonomıkalyq kolledjinde qos birdeı ıgi sharanyń tusaýy kesildi. Onyń biri «Qazaǵymnyń áni – qazynam» atty ádebı-sazdy kesh, ekinshisi Qazaqstan halqy til­deriniń HIII qalalyq festıvali aıasynda ótkizgen «Til – táýelsizdik tuǵyry» atty Til aptalyǵy. Jıyndy kolledj dırektory Myrzabek Tóre­bekuly saltanatty túrde ashyp, kesh qonaqtary Memlekettik syılyqtyń laýreaty, kórnekti ja­zýshy Dúkenbaı Dosjan, M. Maqataev atyndaǵy syılyqtyń ıegeri, belgili aqyn Nesipbek Aıtuly sondaı-aq, sonaý Ulybrıtanııadan tájirıbe alma­sýǵa kelgen 8 kolledj basshylarymen tanys­ty­ryp, qatysýshylarǵa sáttilik tiledi. Bul keshte kómeıine bulbul uıalaǵan halyq­aralyq jáne respýblıkalyq baıqaýlardyń laý­reat­tary, halyq ánderin oryndaýshy sheberler K.Túlembaeva, G.Sarına, D.Muqan sekildi kúmis kó­meı, jeztańdaı ánshiler tyńdarman qaýymnyń delebesin qozdyryp, bir qanattandyryp tastady. Ystyq yqylas-yntasyn dý qol shapalaǵy arqyly bildirgen árbir jannyń kóńilderinen osylaısha kúı tógilip sala berdi. Beınebir tylsym qudi­ret­tiń qushaǵyna uıyp otyrǵandaı. Ánsheıinde kúbir-shýǵa ulasatyn zal ishinde siltideı tynyshtyq or­naǵan. Stýdent jastardyń árbiriniń júregi «Ándi súıseń, menshe súı», dep otyrǵandaı seziledi. Bul árıne, qazaq ónerine, halyq ánine degen úlken qurmet! Ultymyzdyń uly tulǵalary Abaı, Estaı, Balýan Sholaq, Muhıt, Birjan sal, Nartaı sekildi aqyn-jy­raý­larymyzdyń ánderin shyrqap qana qoımaı, óleń­niń shyǵý tarıhyna egjeı-tegjeı toqtalyp ótý de umyt qalmady. Bul jóninde aqyn Nesipbek aǵamyz­dyń: «Kóbinese radıoda oryndaýshynyń atyn aıta­dy da, ándi shyǵarǵan adam umyt qalyp jatady», – degen sózi bul joly eskerýsiz qalmaǵan sııaqty. Ánniń, keshtiń áseri boıǵa – qýat, sezimge shýaq tókti. Raýshan TÁÝIRHANQYZY,  jýrnalıst.