Úlken dastarqan úlken tilekterge jaıylady

18 qazan Búkilálemdik rýhanı kelisim kúni dep jarııa­lan­ǵany belgili. Qazaqstan óz táýelsizdigin alǵan eleń-alań shaqta-aq Prezıdent Nursultan Nazarbaevtyń bastamasymen 1992 jyldyń osy kúni «Rýhanı kelisimniń búkilálemdik kongresin» ótkizgen bolatyn. Sodan beri 18 qazan – Búkilálemdik rýhanı kelisim kúni dep atalady. Byltyr bul kún Astana qa­lasynda 18-20 qazan araly­ǵyn­da atap ótilip, onyń bary­synda «Búkilálemdik rýhanı mádenıet forýmy» ótkizilgen bolatyn. Oǵan 70-ten asa elden 500-den artyq qonaqtar qatysty. Álemniń ǵylym, má­de­nıet, saıasat sala­syndaǵy aty máshhúr qaıratkerleri, óner adamdary álemdik rýhanı kelisimge kelýdiń joldary tý­raly ózderiniń oılaryn ortaǵa saldy. Forým ózara kelisimdi tatý kórshilik jaǵdaıynda beıbit ómir súrý úshin jáne tózim­sizdik pen zorlyq-zombylyqqa qarsy birigýde adamzattyń rýhanı kúshin, aınymas qun­dy­ly­ǵyn paıdalanýdy maqsat etti. Al bıyl bul kún «Rýhanı mádenıet – álemdi jańartýdyń kilti» atty halyqaralyq ǵy­ly­mı-praktıkalyq konferensııamen atap ótilmekshi. Ol 17-19 qazan kúnderi Beıbitshilik jáne kelisim saraıynda bola­dy. Ázirge 23 elden aıtýly qaıratkerler, óner adamdary keletinin bildirgen. Konferensııa barysynda «Qazaqstan Gol­lıvýd juldyzy­nyń kózi­men» atty fılmniń tusaý­ke­ser rásimi bolady. Osy sharaǵa baılanysty uıym­das­ty­rý komıtetiniń teń tóraǵasy, Senat depýtaty Tólegen Mu­ha­medjanov jýrnalıstermen bas­pasóz máslıhatyn ót­kiz­di. Bul máslıhattyń ereksheligi sol, mun­da ózim ǵana sóılemeı, sizderdiń de Rýhanı kelisim kúnin qalaı ótkizgenimiz durys degen pikirlerińizdi estigim keldi, dedi ol óziniń sózinde. 1997 jyldyń 18 qazanyn biz aıryqsha sharamen atap óttik. Dál osy kúni bizdiń elimizdegi 60 myń adamdy bir mezgilde dastarqan basyna otyr­ǵyza aldyq. Oǵan qoǵamnyń barlyq buqara toptarynyń ókil­deri: aýqattylar men áleý­mettik jaǵynan álsiz qorǵal­ǵandar, qyzmetkerler men ýa­qytsha jumyssyzdar, zeınetkerler, jetimder ókilderi – bár-bári qatysty. Das­tar­qan­daǵy otyrys Islam men Pravoslavıe dinderi basshylary­nyń qudaıdan Qazaqstanǵa, hal­qymyzǵa beıbit ómir men jaqsy turmys tilep, syıyný rá­simin jasaýdan bastaldy. Sóıtip, barsha qazaqstandyq­tyń ókilderi bir dastarqannan bir mezgilde dám tatty. Al qa­zaq halqy úshin dastarqannan úlken, das­tar­qan­nan syıly oryn joǵy belgili. Qazaq ata­myz «asyń barda el tany berip júrip, atyń barda jer tany jelip júrip» degen ǵoı. Onyń ústine Qazaq eń jaǵymsyz qy­lyqty da «dastarqannan at­ta­dy» dep sógip jatady. Ondaı kisige qazaqtyń júregi esh­qa­shan jibimeıdi, sondyqtan da qazaq balasy qandaı asyǵys bolsa da dastarqannan attamaı, dá­min tatyp ketedi. Basqa halyqtar arasynda da dastarqannyń qudiretin joǵary qoıatyn dástúrler bar. Rýhanı kelisim kúni barsha qazaqstandyqtar or­talyq úlken dastarqanmen birge úılerinde de dastarqan jaı­yp, elimizge amandyq, ba­qyt, baıandy ómir tilep otyrsa, qandaı ǵanıbet. Aıta ketetin jáıt, dedi só­zi­niń sońynda T.Muhamed­janov, bizge 1997 jylǵy úlken dastar­qan­dy jaıýǵa Qazaq­standa sol kezderi jumys istegen amerı­ka­lyq iskerler demeýshilik jasaǵan edi. Olar bizdiń ıdeıamyzdy birden túsinip, qol­daǵan bolatyn. Osynyń ózi olarǵa mundaı dás­túrdiń ja­qyn­dyǵynan bolsa kerek. Osy­laı degen senator osy ıdeıa­nyń qoldaý taýyp, Rýhanı kelisim kúnin qazaqstandyqtar jyl saıyn osyndaı úlken das­tarqan jaıýmen atap ótkenin qalaı­ty­nyn jetkizdi. Jýrnalıster bir­qatar suraqtar qoı­yp, artynan ozyq ıdeıany qol­dap, halyqqa jetkizýge ýáde berdi. Jaqsybaı SAMRAT.