19 myń-aq shaqyrymǵa qatelesipti
Regbıden Jańa Zelandııada ótip jatqan álem chempıonatyna attanǵan ońtústikafrıkalyq erli-zaıypty Adendorfftar aldyn ala brondap qoıǵan qonaq úılerinen 19 myń shaqyrym qashyqtyqtaǵy jerden bir-aq shyqty. Sóıtse, týrıster qatelesip, qonaq úı nómirin Jańa Zelandııadaǵy Istbornnan emes, aǵylshynnyń osy attas eldi-mekenindegi otelden brondapty.
Ońtústikafrıkalyqtardyń sózderine qaraǵanda, olar eki Istborndy shatastyryp aldyq dep esh oılamapty. Al qateleskenderi qaladaǵy oteldi ári izdep, beri izdep esh taba almaǵan kezde belgili bolǵan. Anglııadaǵy qonaq úıge qatysty aıtatyn bolsaq, ondaǵylar erli-zaıyptylardyń banktegi esep-shotynan tıisti aqshany alyp úlgeripti.
Zeınetkerler Pýtındi monshaǵa shaqyrdy
Prımorelik Uly Otan soǵysyna qatysýshy ardagerler men zeınetkerler Reseı premer-mınıstri Vladımır Pýtındi monshaǵa shaqyryp otyr. Zeınet jasyndaǵylar úkimet basshysyna tıisti ótinish jazylǵan hat joldapty. «Bizdiń sizben tikeleı tanysyp, aýyzba-aýyz sóıleskimiz keledi. Sizdi osy maqsatta shyn kóńilden monshaǵa shaqyramyz», depti olar.
Zeınetkerlerdiń aıtýynsha, monshada býlanyp qana qoımaı, ádemi áńgime-dúken qurýǵa da bolady. Monshany Prımore ólkesi parlamentiniń burynǵy depýtaty Adam Imadaev turǵyzypty. Oǵan ardagerler men zeınetkerler tegin túsedi eken. Osy sebepti de monsha olardyń ýaqyttaryn «mazmundy» ótkizetin súıikti oryndaryna aınalǵan syńaıly.
Buzaqyny áıel men bala almastyrdy
Túrkııanyń fýtbol qaýymdastyǵy jergilikti komandalar jankúıerleri arasynda oryn alatyn tártipsizdikterge baılanysty birjaqty sheshim qabyldaǵan edi. Endi er adamdarǵa belgili bir ýaqytqa deıin súıikti klýbynyń oıynyn tamashalaýǵa múmkindik joq. Esesine áıelder men 12 jasqa deıingi balalar kezdesýlerdi tegin tamashalaı alady.
Túrkııa chempıonaty sońǵy týrynyń oıyndary tuńǵysh ret osyndaı shema boıynsha ótti. Máselen, Ystambuldaǵy jergilikti «Fenerbahche» komandasynyń «Manısaspor» klýbymen kezdesýin tamashalaýǵa 41 myńnan astam áıel men jasóspirim jınalǵan. Stadıonǵa kelgenderdi onyń aldynda áıel polıseıler qurmetpen qarsy alsa, al stadıonnyń ishinde názik jandy jankúıerlerge fýtbolshylar gúl shoqtaryn laqtyryp qurmet kórsetken.
Álemdegi eń qurmetti azamat kim?
Nelson Mandela planetamyzdaǵy eń qurmetti azamat bolyp tanyldy. Amerıkanyń Repulation Institute zertteýler ınstıtýty álemniń 25 elinde júrgizgen suraý salýlar nátıjesi osylaı deıdi. Saýaldamaǵa 50 myńnan astam adam qatyssa, solardyń 78,5 paıyzy óz daýystaryn Ońtústik Afrıka Respýblıkasynyń tuńǵysh qara násildi prezıdentine bergen.
Ekinshi orynda ataqty shveısarııalyq tennısshi Rodjer Federer tur. Ol óziniń sporttaǵy tabystarymen qatar, qaıyrymdylyq qyzmetimen de belgili. Tizimde úshinshi orynǵa amerıkalyq mıllıarder Bıll Geıts laıyq dep tabylypty. Tizimnen oryn tıgender qatarynda sondaı-aq Barak Obama (14 oryn), Brıtanııa premeri Devıd Kemeron (34 oryn), Dmıtrıı Medvedev (43 oryn) pen Vladımır Pýtın (44 oryn) bar.
Sózjumbaqtyń kómegimen sóz salǵan
AQSh-tyń Vırdjınııa shtatyndaǵy Aleksandrııa qalasynda turatyn Nıýman esimdi jigit óziniń unatqan qyzyna sózjumbaq arqyly sóz salý úshin ony túzetin mamandarǵa arnaıy tapsyrys beripti. Sezimińdi tikeleı óziń nege jetkizbeısiń dep suraǵanda, uıalatynyn jáne batyly jetpeıtinin málimdegen.
Nıýmannyń unatqan qyzy Marloý Epshteın sózjumbaq sheshkendi jaqsy kóredi eken. Ol súıikti gazetindegi sózjumbaqty sheship otyryp, sózdiń ózine arnalǵanyn birden uqqan jáne óziniń de jigittiń usynysyna ketári emes ekenin emeýrinimen bildirgen. Sóıtip, kóp uzamaı Nıýman qalyńdyǵyna neke saqınasyn aparyp syılapty. Taıaý bolashaqta eki jas nekelesý rásimin ótkizbekshi kórinedi.
Aqparat agenttikteri materıaldary negizinde ázirlendi.
