S. Toraıǵyrov atyndaǵy Pavlodar oblystyq kitaphanasynyń bastamasymen, Jastardyń bastamasyn qoldaý ortalyǵynyń qoldaýymen «Kereký óńiri Sultanmahmut shyǵarmalaryn oqıdy» jobasy aıasynda aqyndy eske alý kúni ótti.
Aqyn 1920 jylǵy 21 mamyrda ómirden ótti. Aqynnyń eskertkishi 2000 jyly 25 qazanda ornatylǵan, 2009 jyly 14 jeltoqsanda eskertkish Sátbaev kóshesine kóshirildi.
Bul kúni S.Baıazıtov, K.Lýnın, A.Alaqanuly, A.Oralhan syndy pavlodarlyq aqyndardyń, Sharbaqty aýylynyń «Jyr jaýhar» poezııalyq klýby ókilderiniń aqynǵa arnap jazǵan óleńderi oqyldy. Sondaı-aq, Pavlodar munaı-hımııa zaýytynyń jumyskerleri, Nazarbaev zııatkerlik mektebiniń oqýshylary, Jastardyń bastamasyn qoldaý ortalyǵynyń jas býyn ókilderi aqynnyń óleńderin oqydy.
Sharbaqty aýdanynan kelgen «Jyr jaýhar» klýbynyń músheleri Bektasova Sholpan, Kýzgova Lıdanyń oryndaýynda arnaýlar oqyldy. Jyl saıyn oblys ortalyǵynda Sultanmahmut Toraıǵyrovtyń ómiri men shyǵarmashylyǵyna arnalǵan ǵylymı-tájirıbelik konferensııa ótedi, «Toraıǵyrov oqýlaryn» dástúrli túrde ótkizý bastamasyn jergilikti ýnıversıtet óz qolyna aldy. Sodan beri aqynnyń týǵan kúni 28 qazanǵa oraılastyrylyp jyl saıyn «Toraıǵyrov oqýlary» atty ǵylymı shara ótedi. Aqynnyń «Alash urany» óleńi saqtalǵan.
Alash týy astynda
Kún sóngenshe sónbeımiz.
Endi eshkimniń alashty
Qorlyǵyna bermeımiz.
Adamdyqtyń jolyna
Sultanmahmut Toraıǵyrovtyń ǵumyry qysqa bolsa da, sońyna mazmuny mol, rýhty shyǵarmashylyq mura qaldyrdy. Aqynnyń poezııasynda erkindiktiń dabyly estiledi. О́leńmen jáne prozamen jazylǵan romandar, fılosofııalyq jáne áleýmettik poemalar, ocherkter qaldyrdy. Shyǵarmashylyǵy erkin qoǵam, qazaqtyń erkindigi týraly armanǵa toly, elge, jerge degen uly sezimnen turady. Týǵan halqyn otarshyldyqtan, qanaýdan azat etýge, el bostandyǵyna jalyndy kúresker rýhtaǵy óleńderimen ún qosty: «Qarańǵy qazaq kógine órmelep shyǵyp kún bolýǵa» umtyldy.
Farıda Byqaı,
«Egemen Qazaqstan»
Pavlodar.
