Qurmetti musylman baýyrlar, otandastar!
Barshamyzdy qasıetti ramazan aıyna aman-esen jetkizgen Alla taǵalaǵa sansyz shúkirler bolsyn. Sizderdi kúlli musylman qaýymy asyǵa kútken múbárak ramazan aıynyń kelýimen quttyqtaımyn!
Ramazan – on eki aıdyń sultany, berekeli de keshirimi mol aı. Qasıetti aıda adam balasy kóbirek jaqsylyq jasap, izgi amaldardy atqarýǵa tyrysady. Oraza pendeni taqýalyqqa tárbıeleıdi.
Ramazan – Allanyń meıirimi tógilip, jumaqtyń esigi aıqara ashylatyn, ımandy kúsheıtýge múmkindik berilgen berekeli aı. Bul – Jaratýshy Iemizdiń uly syıy ári nyǵmeti.
Saýaptar eselenip jazylatyn aıda jasalǵan qaıyrly istiń qaıtarymy adam balasy úshin qupııa-syr. Tipti, aýyz bekitýshige beriletin syı men saýap, qurmet pen marapat paıǵambarlar men perishtelerge de belgisiz.
Qudsı hadıste Alla taǵala: «Oraza – tek Men úshin. Onyń syıyn (saýabyn) О́zim ǵana beremin...» – dep orazanyń qadiri men qasıetin, máni men mańyzyn atap kórsetedi.
Sharapaty men shapaǵaty mol aıda saýap jınaýǵa, ishki dúnıemizdi tazartýǵa, Jaratýshynyń razylyǵyna bólenýge asyǵaıyq, aǵaıyn! О́ıtkeni, musylmannyń osy aıda ustaǵan orazasy, qosymsha qulshylyqtary, jasaǵan qaıyrymdylyǵy, barlyq saýapty amaldary eselenip jazylady. Orazany rýhanı turǵydan sezingen jan Allanyń teńdessiz syıynan shet qalǵysy kelmeıtini sondyqtan.
Oraza – kúndiz iship-jeýden ózin shekteý degen sóz emes. Ramazan – rýhtyń azyǵy, tánniń shıpasy. Oraza − jan men tándi rýhanı tazartatyn úlken sabyr mektebi. Aýzy berik jandar ádep bilmes pendelerdiń ózine jasaǵan keıbir oǵash is-áreketterin kórip, turpaıy sózderin estise de: «Men orazamyn», – degen bir aýyz sózben nápsisine toqtaý salyp, sabyr saqtaıdy. Al sabyr ıesine beriletin syı – jánnat.
Densaýlyǵyna baılanysty nemese kárilik jetip oraza ustaýǵa shamasy jetpegen adamdar aýyz bekitken kisilerge aýyzashar berse, ol da – úlken saýap. Paıǵambarymyz Muhammed (oǵan Allanyń salaýaty men sálemi bolsyn): «Alla taǵala eń bolmasa bir túıir qurma, tipti bir urttam sýmen bolsa da qamqorlyq jasaǵanǵa saýap jazady…» – degen.
Qadirli jamaǵat!
Elbasy Nursultan Nazarbaev «Bolashaqqa baǵdar: rýhanı jańǵyrý» atty maqalasynda halqymyzdy ulttyq qundylyqtardy qurmetteýge, týǵan jerdi kórkeıtýge, jańashyl oılap, qoǵam úshin ıgi is jasaýǵa, ón-boıymyzdaǵy rýhanı qundylyqty jańǵyrtýǵa úndedi. Elimizdi rýhanı jańǵyrýǵa bastaǵan maqala jurtymyzǵa parasatty oı, paıymdy pikir tastady. Al ramazan – rýhanı jańǵyrýymyzǵa septigin tıgizip, ımanymyzdy kúsheıtýge múmkindik týǵyzatyn qadiri men qasıeti mol aı.
Endeshe, raqym aıy – ramazan qutty bolsyn! Ustaǵan orazamyz, jasaǵan duǵa-tilekterimiz, qulshylyq-ǵıbadattarymyz, árbir qaıyrly amaldarymyz qabyl bolǵaı! Alla taǵala otbasymyzǵa amandyq, jumysymyzǵa bereke-birlik násip etkeı!
Táýelsizdigimiz baıandy, elimiz aman, jurtymyz tynysh bolǵaı! Jaratýshy Iemiz barshamyzdy orazadan orazaǵa deıin aıdan aman, jyldan esen jaqsylyqpen jetkize bersin dep tileımin! Áýmın!
Erjan qajy MALǴAJYULY,
Qazaqstan musylmandary dinı
basqarmasynyń tóraǵasy, Bas múftı
Bas múftıdiń qasıetti ramazan aıyna baılanysty halyqqa úndeýin 3-betten oqısyzdar
