«Qazaqstan – jalǵyz uly qazaqtyń!» degen taqyryppen ótken óner saıysynda ónerpazdar halyqtyq aspaptarda oryndaý, estradalyq mýzyka, kórkemsóz oqý, horeografııa, klassıkalyq janr, beıneleý óneri, fotosýretshiler, eń úzdik ádisker, klýb mekemeleriniń materıaldyq-tehnıkalyq bazasy boıynsha saıysqa túsip, aıtysker aqyndar sahnada sóz ben oı saıystyrdy. Saıys barysynda kóptegen jańa esimder men jańadan qurylǵan óner ujymdary belgili boldy. Festıval Mádenıet qyzmetkerleri kúni Gala-konsertpen qorytyndylanyp, jeńimpazdar esimi jarııa boldy.
Gala-konsertte festıval jeńimpazdarymen birge, óńirdiń mádenıetine úles qosyp júrgen ónerpazdar men mádenıet salasynyń eńbek ardagerleri marapattaldy. Mádenıet qyzmetkerlerin aımaq basshysy E.Toǵjanov quttyqtap, eńbekterine jemis tiledi.
Marapat alǵandardyń arasynda 30 jyl osy salada eńbek etken dırıjer, sazger R.Mádireev, dáýlesker kúıshi, Qurmanǵazy atyndaǵy konservatorııanyń professory, Qazaqstannyń eńbek sińirgen mádenıet qaıratkeri S.Shákirat, kúıshi, ustaz, Qazaqstannyń eńbek sińirgen qaıratkeri O.Qulsarıev, taǵy basqalar bar.
«Mańǵystaý juldyzdary» festıvaliniń qorytyndysynda Jańaózen qalasynyń mádenıet qyzmetkerleri bas júldeni jeńip alyp, avtokólikke ıe boldy. 1-oryndy Mańǵystaý jáne Qaraqııa aýdandary, 2-oryndy Aqtaý qalasy men Beıneý aýdany ıelendi. Al 3-oryn Munaıly men Túpqaraǵan aýdandaryna buıyrdy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
Sýretti túsirgen
Serik MAIEMEROV
