Astanada Jastar teatrynda rejısser Nurqanat Jaqypbaıdyń «Eger de men...» atty spektakli kórermenge jol tartty. Monolog pen áýezdi ánge qurylǵan qoıylym − adamnyń ishki jan tebirenisin, júrek túkpirindegi oıyn tap basyp jetkize bilýimen qundy.
Qazirgi tańda jastar arasynda sheteldiń dańǵara mýzykasy sánge aınalǵan. Mán-maǵynasy joq jattandy jaýyr ánder jaýlap alǵandaı. Osy oraıda avtor Aqan seri men Birjan ánderin, kompozıtor Á.Beıseýov pen N.Tilendıev syndy birtýar tulǵalardyń máńgi ólmes shyǵarmasynan jańasha stılde túrlengen týyndyny pash etti. Taqyryptyń da «Eger de men...» dep atalýynda bir syr jatqandaı. Eger de men qus bolsam kókte qalyqtar edim, sý bolsam teńiz bolyp tolqıtyn edim dep ár adam óziniń ishki oıynan belgili bir jaýap izdeıdi. Sol sansyz saýalǵa jaýap izdeý arqyly adam óziniń «menin» izdeıdi, kóńil túkpirindegi izgilikke toly jolyn qarastyrady.
Sahnanyń sánin − dekorasııa men jaryqtyń berilýi, akterlerdiń dombyra, syrnaı, gıtaramen shyrqata án salýy asha túskendeı.
− Bul spektakl basqalardan ózgerek. Munda adamnyń án arqyly búkil ǵumyry kóz aldyńnan ótip jatady. Bir án bir shyǵarma ǵoı. Kishkentaı ǵana bir shýmaqta kompozıtor men aqyn búkil ómirdiń mánin uǵyndyrady.
Osydan tórt-bes jyl buryn qyrǵyz dramatýrgi Sultan Araıov maǵan óziniń «Mekkege qaraı uzaq jol» atty shyǵarmasyn berdi. Bul 2010 jyly álemdik BBC arnasynda úzdik shyǵarma dep eseptelingen bolatyn. Men ony tárjimalap, sonyń ár jerinen osy spektaklge kirgizdim. Bul sózder mindetti túrde kórermenge qaıtalanyp turýy kerek dep oılaımyn. Qaı óner salasy bolsyn, adamdy tańǵaldyra bilý kerek. О́nerdiń qundylyǵy da sonda. Adamnyń janyn tebirentetin emosııalyq qoıylym usyndyq degen oıdamyn, − deıdi Qazaqstannyń eńbek sińirgen qaıratkeri, qoıýshy rejısser N.Jaqypbaı.
Aıman MUQYShEVA
