Sársenbi kúni New York Times gazeti oqıǵa ornynan tabylǵan jarylǵysh zattardyń qaldyqtarynyń sýretin jarııalaǵan bolatyn. Ulybrıtanııa bıligi tergeý kezinde mundaı materıaldardyń jaryqqa shyǵýy qylmysty ashýǵa kedergi jasaıdy dep sanaıdy.
AQSh resmı ókilderi Manchesterdegi teraktige qatysty málimetter týraly amerıkalyq jýrnalısterge oqıǵa bolǵan soń kóp uzamaı-aq habarlaı bastady. Seısenbi kúni AQSh basylymdary jarylystan qansha adamnyń ólgeni, ony jankeshtiniń jasaǵanyn jazdy. Birneshe saǵat ótken soń terrorshynyń atyn jarııa etti. Al Ulybrıtanııa úkimeti jarylysty jasaýshy Salman Adebıdiń tergelýi tıis týystary, dostary aldyn-ala bilip qoımaýy úshin qylmyskerdiń atyn qupııa ustaǵysy kelgen. Odan keıin Fransııanyń ishki ister mınıstri Jerar Kollomb fransýz televıdenıesine bergen suhbatynda Adebıdiń Lıvııada jáne Sırııada bolǵany týraly aıtty. Bul aqparatty brıtan ókimeti jarııalaǵysy kelmegen.
(Sýrette oqıǵa ornynan brıtan polısııasy áketken, New York Times jarııalaǵan detonator)
Budan birneshe saǵat ótken soń Ulybrıtanııanyń ishki ister mınıstri Ember Radd AQSh ókimetinen teraktige qatysty aqparattardy jarııalaýdy toqtatýdy talap etti. «Brıtan úkimeti tergeý jumystarynyń qupııa saqtalýy, josparlardyń jarııa bolmaýy úshin aqparattar aǵynyn baqylaýdan shyǵarmaýdy qalaıtynyn anyq bildirgen bolatyn. Sondyqtan olardyń basqa derekkózder arqyly jaryqqa shyǵyp ketýi qynjyltady. Men áriptes dostarymyzǵa ondaı árekettiń endi qaıtalanbaýy kerektigin anyq jetkizdim» degen Ember Raddtyń sózin The Guardian keltiredi. Basylymnyń aıtýynsha, brıtan resmı adamdarynyń AQSh-qa mundaı ókpe aıtýy sırek kezdesetin oqıǵa.
Alaıda, AQSh basylymdary teraktige qatysty málimetterdi jarııa etýdi toqtatpady. Keshe New York Times Manchesterdegi shabýylda qoldanylǵan bomba detaldarynyń, bomba salynǵan rıýkzak qaldyqtarynyń jáne bombany jarýǵa qoldanylǵan detonatordyń sýretin jarııalady. The Guardian-nyń aıýtynsha, bular – sotta dálel retinde qoldanarlyq asa mańyzdy dáıekter. Brıtan tarapy bul materıaldardy da amerıkalyq jýrnalısterge AQSh bıligi berdi degen pikirde.
Búgin málim bolǵan aqparattar boıynsha, brıtan premeri Tereza Meı NATO sammıtinde bolatyn kezdesýde AQSh prezıdenti Donald Tramppen osy máseleni talqylaýy múmkin.
Erjan Ábdiraman, «Egemen Qazaqstan».
