Qazaqstanda «EKSPO-2017» halyqaralyq mamandandyrylǵan kórmesi aıasynda booking.com jáne Airbnb syndy ataqty álemdik júıelermen sınhrondalǵan torlet.com arnaıy saıty iske qosyldy.
«Páterdi jalǵa berý týraly jarnama beretin Krisha, OLX syndy belgili saıttardy ashsańyz táýligine 20-30 myń shamasynda jarnama jarııalanady. Bul rette jarnamanyń kóptigi suraq týyndatady. Al málimet boıynsha Astanada táýligine jalǵa beriletin páter sany 3000 ǵana. Shyn máninde bir páterdi 10 rıeltor usynýy múmkin», – dep túsinirdi A.Adambekov.
Sondaı-aq jarnamada shyndyqqa janaspaıtyn sýretter ornalastyrylady ári jaldaý aqysy da naryqtaǵy baǵadan joǵary.
«Saıyp kelgende tutynýshy birin tańdap, shyn máninde basqasyna ıe bolady. Joǵaryda aıtylǵandy eskere kele páterlerin jalǵa berýshiler assosıasııasy men bizdiń kompanııa birlesip torlet.com saıtyn iske qosty», – dedi ol.
Jańa portaldyń ereksheligi – páterlerdi jaǵa berý týraly jalǵan aqparat joq. Onda ornalastyrylǵan sýretter de shyndyqqa janasady ári jaldaý aqysy da qoljetimdi. Sonymen birge jalǵa alynǵan páter torlet.com saıtynda kórsetilmeıdi.
«Iаǵnı saıt tek bos turǵan páterlerdi ǵana kórsetedi. Tutynýshy páterdi ornalasqan aýdany men jaılylyǵyna baılanysty ózi tańdaıdy. Tańdaý jasalǵan soń jalǵa berýshige málimet beriledi. Sonda basqa rıeltorlar óz qyzmetin usynyp azamattardy mazalamaıtyn bolady», – dedi A.Adambekov.
Páterderdi jalǵa berý týraly barlyq jarnamalardyń rastyǵy tekserilip, jalǵan jarnamalar buǵattalady nemes birjola óshiriledi.
«Assosıasııa mamandarymen birlesip atalǵan saıtta jalǵan jarnamanyń paıda bolmaýyn qadaǵalaımyz. Tapsyrys túskende jarnamanyń ras-ótirigin anyqtap, shyn mánindegi jaǵdaıǵa kóz jetkizemiz. Sondyqtan EKSPO qonaqtaryna jalǵan aqparatpen aldanyp qalmaýy úshin osy saıttyń kómegine júginýdi usynamyz», – dedi ol.
