«Qoldanystaǵy zańdaǵy qaıshylyqtarǵa baılanysty biz olardyń jumysyn baqylaı almaımyz. Jedelsaty kompanııalaryna yqpal etýge quzyrly emespiz. Osyǵan oraı Bas prokýratýra men Ulttyq ekonomıka mınıstrligine bizdiń vedomstvoǵa baqylaý qyzmetin berýin surap ótinish joldadyq. Búginde osy máseleni sheshý úshin jan-jaqty júmys júrgizilip jatyr», – dedi Astana qalasy Turǵyn úı ınspeksııasynyń basshysy Álıhan Qýatbekov.
Onyń málimetinshe, taıaýda Astana ákimdiginde jıyn ótkizilip, onda turǵyn úı-tehnıkalyq ınspeksııasyn qurý máselesi kóterilgen.
«Bizdiń basqarmamyzdyń qyzmetkerleri memlekettik ınspektor mártebesine ıe bolýy kerek. Bul jedelsaty mekemeleriniń jumysyn baqylaýǵa múmkindik beredi. Eger bul quzyrǵa ıe bolsaq tehnıkalyq aqaý týyndaǵan jaǵdaıda ony joıǵanǵa deıin jedelsaty jumysyn toqtata alamyz», – dedi Á.Qýatbekov.
Sonymen birge ol Astanada barlyq jedelsaty qondyrǵylaryna monıtorıng júrgiziletinin jetkizdi.
«Jedelsatylardyń tehnıkalyq jaǵdaıy men PIK-diń prosedýralyq mindettemelerin qalaı oryndap jatqanyn ári jedelsaty kompanııalarynyń jumys reglamentin teksermek nıettemiz. Atalǵan taldama elordadaǵy jedelsatylardyń jalpy jaǵdaıyn anyqtaýǵa jáne kompanııa men PIK-diń máseleni sheshýdegi jaýapkerligin anyqtaýǵa múmkindik beredi. Bul keshendi úlken jumys, jaqyn arada iske kirisemiz», - dedi ol.
Búginde Astanada qalada 6 577 jedelsaty men jedelsaty qondyrǵysyna qyzmet kórsetetin 69 kompanııa bar. Onyń 4 879-y turǵyn úılerde, 1 728-i ákimshilik ǵımarattarda ornalasqan.
