2013 jyly «Aqtaý qalasynyń medısınalyq kolledji» men «Alfa-Týr Aktaý» JShS arasynda qurylys jumysyn júrgizý týraly kelisim-shart jasaqtalady. Kelisim-shart negizinde qurylys kompanııasy emhana, medkolledj, sport kesheni men turǵyn úı salýǵa kirisedi. Turǵyn úı qurylysyn salý kezinde eki aradaǵy kelispeýshilik týyndaıdy da, daýda úleskerler zardap shegedi. О́z esebinen turǵyn úı salǵan seriktestik jeke tulǵalarmen páter satý-satyp alý týraly kelisim-sharttarǵa otyryp, úleskerler qurylys nysandaryn qarjylandyryp kelgen. Alaıda, jer paıdalanýshy men bas merdiger arasynda kelispeýshilikter saldarynan kolledj dırektory men seriktestik arasyndaǵy kelisimshart buzylyp, nysan qurylysyn júrgizgen seriktestik ákimshilik jaýapkershilikke tartylyp, ǵımarattyń qurylys-montajdaý jumystary aıaqtalmaı qalady. Nátıjesinde, turǵyn úıler salynyp bitkenimen, paıdalanýǵa qabyldanbaǵandyqtan jáne kommýnıkasııalyq jeliler tartylmaǵandyqtan, páter ıeleri belgilengen merzimde úılerine kire almaı qalady.
Qurylys jumysyn sońyna deıin jetkize almaǵan bas merdiger ortaq paıdalanýǵa berilgen jer ýchaskesindegi óz úlesin anyqtaý týraly jer paıdanalýshyǵa qarsy sotqa talap aryzben júginedi. Sot prosesi bastalǵan soń úleskerler de sotqa júginip, ortaq úlestegi jerlerin bólip, anyqtap berýdi, óz mindetterin atqaryp, turǵyn úı máselesin barlyq jaqqa tıimdi etip sheshýdi suraıdy.
Uzaq merzimge sozylǵan sot otyrysy úsh taraptyń medıatıvtik kelisimge kelýimen aıaqtalyp, eki tarap ózara tıimdi sheshimge kelse, úshinshi tarap – úleskerler turǵyn úı kesheniniń tehnıkalyq qujattaryn jasap, kommýnaldyq jelilerdiń tartylýyna qol jetkizdi. Sebebi, sot prosesin júrgizgen sýdıa jas bolsa da kásibı biliktiligin tanytyp, úsh tarapqa da tıimdi sheshim shyǵarýdyń jolyn qarastyryp, durys baǵyt-baǵdar berýiniń arqasynda taraptar medıatordyń kómegine júgingen edi. Osylaısha, daý sońy kelisimmen aıaqtaldy. Sot uıǵarymy zańdy kúshine engennen soń úleskerlerden, «Aqbulaq» turǵyn-úı kesheni turǵyndary atynan Qazaqstan respýblıkasy Joǵarǵy Sotynyń tóraǵasy Q.Mámıdiń atyna Alǵys hat kelip tústi.
«Sot sheshimi qordalanǵan máseleniń túıinin barlyq jaqqa tıimdi etip shyǵaryp, úleskerler arasyndaǵy áleýmettik tolqýdy der kezinde basty. Sebebi, biz bar jıǵan-tergenimizdi salyp otyrǵan jalǵyz baspanamyzdan aıyrylǵan jaǵdaıda eń aqyrǵy áreketke barýǵa daıyn tur edik. Sondyqtan, máseleniń baıyby men onyń saldaryn túsinip, qarapaıym adamdardyń zańdy quqyǵyn qorǵap, sýdıaǵa tán biliktiligimen, kásibı sheberligimen syılastyq pen izettik tanytqany úshin, ádil sheshim shyǵarǵany úshin Mańǵystaý oblystyq sotynyń tóraǵasy J.Alanovqa jáne osy isti aıaǵyna deıin qaraǵan Mańǵystaý oblysynyń mamandandyrylǵan aýdanaralyq ekonomıkalyq sotynyń sýdıasy A.Bekbolatovqa alǵys bildiremiz» delingen hatta.
«Aq bulaq» turǵyn úı kesheni turǵyndary úsh tarapty da rıza etken jan-jaqty, saýatty sot sheshimine rıza.
Gúlaıym Shyntemirqyzy,
«Egemen Qazaqstan».
AQTAÝ
