Qyzylorda oblysynyń Jańaqorǵan aýdanynan kelip túsken 10 jasar Aqdıdar Naqypova peshke abaısyzda qulap, denesiniń qyryq paıyzy kúıip qalǵan. Durys kútim kórmegendikten tamaq asty men qoltyǵy túgel jabysyp qalǵan. Amerıkalyq dárigerlerdiń qaraýynda bolǵan Aqdıdarǵa operasııa sátti jasalyp, endi moıny men oń qolyn erkin kótere alatyn boldy.
– Aıaq terisinen alynǵan terini jyrtylyp ketken aralyqtardy jasyrýǵa aýystyrdyq. Eki jarym saǵatqa sozylǵan aýyr operasııa artta qaldy. Qazir búldirshinniń jaǵdaıy jaqsaryp keledi, – deıdi I sanatty ortoped-travmatolog Mels Orynbaıuly.
Adamnyń dene, bet-álpetindegi kemistigi ómir boıǵy psıhologııalyq kúızeliske ushyratatyny ras. Bireýler týa bitti, endi biri baıqaýsyzda túsken jaraqat áserinen zardap shegip jatady. Ásirese, sábılerdiń aınaǵa qaraýdan júreksine, qaımyǵa ómir súrgeni kimdi de bolsyn beı-jaı qaldyrmas. 1994 jyldan beri álemniń 20 elinde 5 myńnan astam operasııa jasaǵan Surgicorps International uıymynyń negizin qalaýshy, plastık-hırýrg Djek Demos Qazaqstanda áli de birneshe kún qalyp, pasıentterdiń jaǵdaıyn baqylamaq.
– Qazaqstandyq hırýrgtarmen birge bes kún ishinde 73 operasııa jasadyq. Jergilikti áriptesterdiń kásibı biliktiligine tánti boldym. Operasııa «qoıanjyryq», «qasqyr aýyz» týa bitti aýrýlary men aıaq-qol terisiniń kúıigine, teri kemshiligi bar pasıentterge jasaldy. Erteń komandanyń keı dárigerleri alǵa qoıylǵan mindetterdiń aıaqtalýyna oraı, AQSh-qa qaıtpaq. Men teri aýystyrǵan Aqdıdar sekildi pasıentterdiń tańý prosedýrasyna qalmaqpyn. Ol óte kúrdeli prosess. Bizdiń maqsatymyz – sapaly medısınalyq kómekke zárý adamdardyń qaı elden ekenine qaramastan tegin járdem berý, – deıdi Djek Demos.
Joba aıasynda Ana men bala ulttyq ǵylymı ortalyǵy men Surgicorps International (AQSh) plastıkalyq hırýrgtary elimizdiń ár óńirinen kelgen 300-den asa dene kemistigi bar balany, onyń ishinde balalar úıiniń 14 tárbıelenýshisin qabyldap, kómek kórsetti.
Qazaqstan tarapynan qoldaý kórsetip, operasııa shyǵyndaryn ótegen «Asyl bala» qaýymdastyǵynyń quryltaıshysy Gúlnár Tilektesqyzynyń sózine qaraǵanda, bul áleýmettik mańyzy zor joba aldaǵy ýaqytta da jalǵasyn tappaq.
Joba kezinde Nazarbaev Ýnıversıteti Medısına fakýltetiniń stýdentteri erikti retinde qatysty. Olar jergilikti medısına ókilderi men Surgicorps komanda músheleri arasynda aýdarmashy bola júrip, tájirıbe jınady.
Aısáýle Sezbek
