Konferensııanyń basynda, táýelsiz elimizdiń tarıhynda asa mańyzdy oryn alatyn, qaı elde bolsaq ta eldik mártebemizdi aıǵaqtap otyratyn memlekettik rámizderimizge bıyl 25 jyl tolyp otyrǵanyn jáne osyndaı tarıhy bar rámizderdiń arasynda eltańbanyń orny erekshe ekenin atap ótip, búgingi jıynnyń maqsaty men mańyzy týraly Eýrazııa ulttyq ýnıversıtetiniń prorektory Dıhan Qamzabekuly qysqasha tanystyrdy.
Kelesi kezekte L.N.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov konferensııaǵa jınalǵan qonaqtardy quttyqtap, búgingi kúni ótkeli otyrǵan óte mańyzdy is-sharany jarııalady. Osydan soń bilim ordasynda jańa standarttaǵy Eltańbanyń tusaýy kesildi. Eltańba avtorynyń aıtýyna qaraǵanda, burynǵyǵa qaraǵanda jańa úlgidegi eltańbanyń negizgi qundylyqtary ózgermegen. Jańadan qabyldanǵan standarttyń ereksheligi – ishindegi kóptegen detaldarǵa óziniń ataýlary berilip, onyń tarıhy men maǵynasy, dástúrlik sıpattamasy kórinis tapqan jáne daıyndaý kezinde avtor qazirgi tehnologııa júıesine súıengen.
«Bul – tarıhı sát. Jańa standarttaǵy Eltańbanyń birinshi sátin kórip otyrmyz. Memlekettik rámizder – eldik saltanat nyshany. Onyń ishinde Eltańba el mereıin asqaqtatatyn boıtumar dep aıtar edim. Elbasymyz N.Á.Nazarbaev: «Jańǵyrý jolynda babalardan mıras bolyp, qanymyzǵa sińgen, búginde tamyrymyzda búlkildep jatqan izgi qasıetterdi qaıta túletýimiz kerek», degen edi. Búginde ulttyq sana biregeıligi, eldik dástúr, t.b. bári de bilim men ǵylym salasyna aınalyp otyr. Eltańba tarıhy – ult tarıhy, el shejiresi. Onyń negizi men mazmuny, beınesi men estetıkasy ǵylymı-zertteýdi talap etedi. Eline qaltqysyz qyzmet etken Jandarbek Málibekov myrzaǵa alǵysymyz sheksiz. О́z qasıetimen, jıǵan bilimimen stýdentterimizge sapaly dáris berip júr dep senimmen aıta alamyn», – dedi óz sózinde EUÝ rektory Erlan Sydyqov.
Saltanatty sharaǵa Parlament Májilisiniń depýtaty Baqytjan Ábdiraıym, ǵalym Seıit Qasqabasov, sáýlet óneri professory Bekrımjon Glaýdınov, Ardagerler keńesi tóraǵasynyń orynbasary О́mirzaq Ozǵanbaı, sondaı-aq, ǵalymnyń stýdenttik jyldaryn birge ótkizgen kórshiles Reseı, О́zbekstan elderinen kelgen dostary qatysty.
Sonymen qatar, saltanatty keshte Jandarbek Málibekovtiń «Qazaqstan Eltańbasy» atty kitabynyń tusaýkeseri ótti. Bul kitapta jańa standart úlgisi men parametrleri týraly mol aqparattar qamtylǵan.
Jurtshylyqtyń erekshe nazaryn aýdarǵan professor S.Negımov baıandamasynda «Dúldúlder, darabozdar qazaq elinde jetkilikti, sonyń biregeıi – Jandarbek Málibekov. Ol qazirgi qazaq elindegi zııalynyń zııalysy, qarapaıymnyń qarapaıymy. Eltańbaǵa ol kisiniń ózi «Ol – memlekettiń ıdeologııalyq kartasy», dep sıpattama bergen. Bul Eltańba eltaný, mádenıettaný, jaratylystaný ilimderimen, sondaı-aq halyqtyń, salt-dástúrimen, yrymdarymen baılanysty. Eltańbada qazaqtyń dúnıetanymynyń iri-iri kórinisteri, qubylystary kórinis tapqan. Máselen, bir ǵana kıiz úıdi alaıyq. Onyń bes myń jyldyq tarıhy bar. Munyń bári Jandarbek aǵanyń kitabynda jazylǵan», – dep qaıratkerge baǵasyn berdi.
Aıan ÁBDÝÁLI,
«Egemen Qazaqstan»
