Teatrdaǵy 90 ártis túgel qamtylmasa da, sol saýalnama nátıjesinde eń tanymal elý akterdi túzgen sol tizimniń ushar basynda keıde Asanáli Áshimov tursa, keıde Azamat Satybaldy turady. Kórermender kózimen baıyptalǵan tanymaldylyq týraly áńgimede KSRO halyq ártisiniń ózimen teń túsetin jańa kezeńniń jarqyn ókili Azamattyń dál qazir abyroı-mártebesiniń asqaqtap turǵan shaǵy. О́ner alamanynda at terletkenniń bárine báıge buıyra bermeıdi, bilimi men eńbegin sarp etkenge ǵana sáttilik qolyn sozady. Terin aǵyzyp, akter atanǵan Azamatqa da sáttilik talaıdan beri serik bolyp, óner kóshiniń basynan kórinýge múmkindik syılaýmen keledi.
Boıyndaǵy talantyn talabymen ushtap, tynbaı izdenis ústinde júretin Qazaqstannyń eńbek sińirgen qaıratkeri Azamat Satybaldy úshin bıylǵy jyl tabyspen bastaldy. Tanymal teatr jáne kıno akteri jýyrda ǵana «Bir sen úshin...» atty fılm túsirip, rejısser retinde baǵyn synap baıqasa, endi «28 teatr» dep atalatyn óziniń jeke teatryn ashyp, shynaıy ónerdiń tabandy izdenispen óristeıtinin óz mysalymen dáleldeýge kóshti. Azamattyń jeke teatr ashýy almatylyqtar úshin ǵana emes, mádenı ómirdegi aıtýly oqıǵa retinde qabyldanyp otyr. Qazaqstandaǵy 58 teatrdyń qataryna 59-bolyp qosylyp otyrǵan Azamattyń jeke oshaǵy «Kúıeýińizdi satyńyzshy» atty komedııalyq qoıylymmen Almatydaǵy Qýyrshaq teatrynda tusaýkeserin jasap, shymyldyǵyn ashty.
Qazaq teatrlarynyń sahnalarynda úzdiksiz qoıylyp kele jatqan M.Zadornovtyń áıgili komedııasy «28 teatr» sahnasynda múlde jańasha ınterpretasııalanýymen nazar aýdartty. Osyndaı qadamdary arqyly Azamat usaqtalyp bara jatqan adam qundylyǵyn bıikke kóterip, alǵa shyǵarǵysy keletin azamattyq kózqarasyn ańdatqandaı.
«Kúıeýińizdi satyńyzshy» – meniń eń jaqsy kóretin spektaklderimniń biri. Talaı aýdarmalardy qarastyra kele, bir kezde ákemteatrdyń sahnasynda Orazhan Kenebaevtyń rejısserligimen qoıylǵan osy shyǵarmaǵa toqtalyp, múmkindiginshe qazaqy boıaý ústemeleýge tyrystyq», – dedi Azamat tusaýkeser rásiminde.
Qoıylymnan soń sóz alǵan A.Satybaldynyń «ónerdegi ákesi», ustazy, professor Esmuhan Obaev akterlerdiń qarymy men sheberligine baǵasyn, al shákirtine batasyn berip, teatr jumysyna sát-sapar tiledi.
Aıgúl AHANBAIQYZY,
«Egemen Qazaqstan»
ALMATY
