Mádenı sharany Qorǵan oblysy qazaqtarynyń ulttyq-mádenı avtonomııasy uıymdastyrdy.
«Bul óńirde 15 myńǵa jýyq aǵaıynymyz turady. Kópshiliginiń ata-babalary úrkinshilik, asharshylyq jyldary taǵdyrdyń tálkegine ushyrap, týǵan topyraqtan kóz jazyp qalǵan. Biz úshin Qazaqstannyń orny bólek. Atajurtymyz bolǵandyqtan, tilegimiz de, júregimiz de bir. Barlyq sala boıynsha qoıan-qoltyq aralasyp turamyz», – deıdi avtonomııa tóraǵasy Qaırat Oralov.
Avtonomııa demeýshilik, qaıyrymdylyq sharalaryna úzbeı atsalysyp turady. Joǵary bilimdi maman Rýslan Júsipovtyń B. Okýdjva atyndaǵy halyqaralyq ánder baıqaýyna qatysýyna qarjylaı járdemdesken. Ol bolsa, úmitti aqtap, Gran-prı ıegeri atanǵan. Sol sııaqty Qorǵan qalasyndaǵy qazaq stýdentteriniń fýtbol komandasy, avtonomııa janyndaǵy jastar qanaty turaqty qamqorlyqqa alynǵan. Sońǵy on jylda altyn medal alǵan oqýshylardyń úshten ekisi–qazaq balalarynyń úlesinde. Mektepterde maqtaý marapatyn ıelenetinderdiń jartysyna jýyǵy ózimizdiń búldirshinder.
«Týǵan jer!» atty mádenıet festıvali qalyń aǵash baýraıynda ornalasqan Obýtkovskoe iri eldi mekeninde ótti. Soltústik Qazaqstan obylysy delegasııasynyń jetekshisi, Dúnıejúzi qazaqtary qaýymdastyǵy oblystyq bólimshesiniń tóraǵasy Saǵyndyq Salmurzın jurtshylyq aldynda sóılegen sózinde «Elbasymyz Nursultan Nazarbaev «Bolashaqqa baǵdar: rýhanı jańǵyrý» maqalasynda qazaqstandyqtarǵa «Týǵan jer» baǵdarlamasyn usynǵanyn, onyń «Týǵan elge» degen aýqymdy jobaǵa ulasatynyn jetkizdi.
Festıvalde aq shańqan kıiz úıler tigilip, qoldanbaly óner kórmeleri men dámdiligi til úıiretin ulttyq taǵamdar jaımasy tamashalandy. «Ashamaıǵa mingizý» rásimi kórsetildi.
Makýshın aýdanynyń basshysy Vıktor Vorotynsev óz sózine tarıhı tamyrlastyǵy áriden órbıtin Qazaqstan men Reseı arasyndaǵy dostyqty, kórshilik tatýlyqty arqaý etti. Qazaqtardyń aýyzbirligin, eńbeksúıgishtigin, baýyrmaldyǵyn, ulttyq qundylyqtardy qasterleıtinin súısinispen atap ótti.
«Shekaralyq aımaqta ornalasqandyqtan, Soltústik Qazaqstan oblysymen ekonomıkalyq, áleýmettik, mádenı baılanystarymyz jan-jaqty damyp keledi», – dedi ol.
Oral óńiri halyqtar assambleıasynyń tóraǵasy Vladımır Ýfımsev bir top qazaq azamattaryn marapattady. Qorǵan oblysynyń qurmetti azamaty, fılologııa ǵylymdarynyń doktory Valentına Fedorovanyń Qazaqstan, qazaqtar jaıly tolǵanystary jınalǵandarǵa erekshe áser etti.
Shette júrse de, «Qazaqstan» uǵymyn júreginiń túkpirinde saqtap, parasat-biliktiligimen, eńbekqorlyǵymen qazaqtyń abyroıyn asyryp, mereıin tasytyp júrgen namysshyl, minezdi, jigerli qandastarymyzdyń kóptigi qýantady.
О́mir Esqalı,
«Egemen Qazaqstan».
Soltústik Qazaqstan oblysy.
