BÚGIN BELGILI BOLADY

Beısenbi kúni Astanada ótip jatqan bokstan Qazaqstan chem­pıo­natynyń shırek fınaldyq kez­desýleri odan ári jalǵasty. Bul jekpe-jekter 51, 57, 64, 75 jáne 91 kılodaǵy salmaq dárejesinde ótti. Osy kúni sharshy alańǵa alǵash bolyp kóterilgen 51 kg. salmaq­taǵy kezdesýde jambyldyq boks­shy Oljas Sáttibaev “Dınamo” qoǵamy­nyń ókili Rahmanberdi Jıen­baevty aıqyn basymdylyq­pen utty. Esep – 10:4. Jalpy, osy kezge deıin bul salmaqta 2005 jylǵy álem chem­pıonatynyń qola júldegeri Mırat Sársenbaevtyń aldyn oraıtyn eshkim joq edi. Mırat sońǵy kezderi kásibı boks­qa aýysqan soń, onyń ornyn halyq­­aralyq dárejedegi sport sheberi Oljas basty deı alamyz. Tarazdyq jas talant – kadet­ter arasyndaǵy álem chem­pıony, jas­tar arasyndaǵy álem chempıonaty­nyń kúmis júldegeri. Osy kúngi kezdesýlerde Oljastan basqa báseke bastalysymen sharshy alańnyń shyraıyn keltirip júrgen Ismaıl Ahýnov, Álı Baıbozov pen Mıras Jaqypov ta kelesi aına­lymǵa joldama aldy. 57 kılo salmaqta chempıonat­ta­ǵy eń iri esep tirkeldi. Munda asta­na­lyq Dýman Álimov qarsyla­syn 31:1 esebimen utty. Sondaı-aq, kelesi bolyp rıngke shyqqan qostanaılyq Aslan Muqanov, Jaqsylyq Ilııasov (ShQO) pen Jan­dos Momynov (Aqmola obly­sy) qarsylastaryn tize búktirdi. 64 kıloda qyzylordalyq Rús­tem Sybaev salmaq qýǵannan ke­ıin onyń ornyn Danııar Eleý­sinov, Mereı Aqshalov (ekeýi de Astanadan) pen almatylyq Aıdar Sháribaev basqan edi. Beısenbi kúngi básekelerde osy úsheýiniń arasynan baby men baǵy kelisken Danııar men Aıdardyń ǵana joly boldy. Al sharshy alańǵa jergi­likti jankúıerlerdiń úmitin arqalap shyqqan Mereı bir upaı aıyrmasymen Ádilet Egizbaevtan (ShQO) jeńilip qaldy. Kelesi, 75 kılo salmaqta taǵy da Jambyl men Shyǵys Qazaqstan oblystarynyń ókilderi jartylaı fınalǵa joldama aldy. Onda elimizdiń eki dúrkin chempıony Ádilet Nııazymbetov pen Danııar Eleýsinovtiń aldyn Danabek Sý­janov pen Nurdáýlet Jarmanov orap ketti. Sol sekildi osy salmaqta almatylyq Nurmatov pen jambyldyq Baımatovtyń qarsylastarynan aılasyn asyryp ketkenin atap ótkenimiz jón. Osydan keıin báseke 91 kılo salmaq arasynda jalǵasty. Munda respýblıkalyq jáne halyqaralyq jarystarda ústemdik etip júrgen qos­tanaılyq Jan Kosobýskıı, byltyrǵy jylǵy Azııa chempıony Vasılıı Levıt, kerekýlik Dmı­trıı Gotfrıd pen sońǵy kezderi jara­qaty­nan aıyǵyp, qatarǵa qosylǵan mańǵystaýlyq Erdos Jańabergenov kelesi aınalymǵa shyqty. Búgin jartylaı fınalǵa joldama alyp, keshe tańerteńnen keshke deıin “Dáýlet” sport keshe­nin­de kerilgen sharshy alańda aq­tyq aıqasqa shyǵý úshin qolǵap túıistirgen boksshylar kezdesetin bolady. Sóıtip, baby men baǵy kelisken boksshylardyń arasyn­daǵy naǵyz myqtylar búgin kesh­ke anyqtalady. Dastan KENJALIN.