Saıası qujattyń árbir basymdyǵy boıynsha jeke-jeke toqtalǵan aýdan ákimi Otyrarda «Ekonomıkanyń jedeldetilgen tehnologııalyq jańǵyrtylýy» basymdyǵy aıasynda bıyl Údemeli ındýstrıaldy – ınnovasııalyq damý baǵdarlamasy boıynsha qurylysqa qajetti qamys plıtasy jobasy iske qosylatynyn aıtty. Jergilikti «PSK «Aq Mergen» JShS-i uıytqy bolyp otyrǵan joba júzege asqanda 30-dan astam jumys orny qurylatyn bolady. Jylyna 750 myń sharshy metr qamys plıtasyn jasaýǵa qaýqarly joba oblystaǵy erekshe ári jalǵyz joba bolyp otyr.
«Otyrar aýdanynda bıyl egistik kólemi 25 myń ga bolady dep eseptesek, qajetti túgendeý (ınventarızasııa) jumystarynyń nátıjesinde onyń kólemi 3 myń ga ulǵaıyp, 28 ga jetpek. Oǵan qosa, osy jyly Syrdarııa men Arys ózenderinde sýdyń mol bolýyna baılanysty, «qyzyl sýdy» egis alqaptary men jaıylymdyq jáne shabyndyq jerlerge burdyq. Nátıjesinde 10 myń gektar jer tegin sýaryldy. Munan bólek, jaz aılarynda paıda bolatyn sý tapshylyǵynyń aldyn alý maqsatynda artyq sýdy jınaıtyn tabıǵı oıpatty saılardy anyqtap, tirshilik nárin jınap qoıdyq. Nátıjesinde, jaz mezgilinde Maıaqum men Kóksaraı aýylyndaǵy 2 myń ga jýyq egistik alqaptar osy tasqynsýdyń esebinen sýarylmaq. Sonymen qatar, Kóksaraı saıy mańyn demalys aımaǵyna aınaldyryp, balyq sharýashylyǵyn qolǵa alý josparda bar», - dedi E.Aıtahanov.
Munan bólek, júgeri ósirýmen aty shyqqan otyrarlyqtar byltyr 5428 ga egistikke júgeri ekse, bıyl onyń kólemi 2,5 myń ga artyp, atalǵan dándi daqyl túri 8500 ga egilmek. Otyrar aýdanynyń klımaty qarqyndy baý ósirýge qolaısyz bolsa da jospardaǵy 65 ga ornyna 77 ga baý otyryǵyzylyp, jospar 118,4 % oryndalǵan. Joldaýda aıtylǵan negizgi baǵyt - kooperatıvter uıymdastyrý jumystary sheńberinde aýdanda ótken jyly 123 sharýa birigip 20 aýyl sharýashylyǵy kooperatıvi qurylsa, bıyl 121 sharýa birigip, 13 aýyl sharýashylyǵy kooperatıvi qurylyp, jalpy sany 33-ke jetipti.
Tilshilermen kezdesýde E.Aıtahanov aýdannyń aýyz sý, tabıǵı gazben qamtamasyz etý, abattandyrý, jol, káriz júıesi, bilim berý, densaýlyq saqtaý, týrızm syndy salalaryndaǵy jańalyqtardy da aıtyp berdi. Málimetinshe, tıisti jumystar jospar aıasynda atqarylýda.
