Shaǵyn formatta ótken otyrysta úkimetterdiń basshylary ınnovasııalar, atom energııasy, kólik qaýipsizdigi, geodezııa, radıonavıgasııa, kontrafaktilik ónimderdi shyǵarýǵa qarsy is-qımyl, sonymen qatar zııatkerlik menshikti qorǵaý salalaryndaǵy yntymaqtastyqty jandandyrý máselelerin talqylady.
Qatysýshylar keń formatta jalǵasqan keńes jumysynda qazaqstandyq materıaltaný toqamaǵy bazasyndaǵy tájirıbelik keshendi birlesip paıdalaný týraly kelisimdi, sonymen qatar 2017-2019 jyldarǵa arnalǵan halyqaralyq tasymaldar kezinde TMD-ǵa múshe memleketterdiń aýmaǵynda Kólik qaýipsizdigi strategııasyn iske asyrý jónindegi birinshi kezektegi sharalar josparyn talqylady.
TMD elderiniń úkimet basshylary keńesiniń qorytyndysy boıynsha birqatar qujattarǵa, atap aıtqanda Memleketaralyq ınnovasııalyq yntymaqtastyq baǵdarlamasyn iske asyrý boıynsha 2017-2019 jyldarǵa arnalǵan Is-sharalar kesheni týraly qujatqa, atom energııasyn beıbit maqsatta paıdalaný salasyndaǵy normatıvtik-quqyqtyq jáne normatıvtik-tehnıkalyq retteý, sáıkestikti baǵalaý, standarttaý, akkredıtteý jáne metrologııalyq qamtamasyz etý boıynsha tásilderdi úılestirý týraly kelisimge qol qoıyldy.
Budan ózge, kontrafaktilik ónim óndirýge jáne taratýǵa qarsy is-qımyl salasyndaǵy yntymaqtastyq týraly Kelisimge, zııatkerlik menshikti quqyqtyq qorǵaý jáne saqtaý salasynda yntymaqtastyq ornatý jáne zııatkerlik menshikti quqyqtyq qorǵaý jáne saqtaý máseleleri jónindegi Memleketaralyq keńes qurý týraly kelisimge ózgerister engizý týraly Hattamaǵa qol qoıyldy.
Sondaı-aq, TMD elderiniń Memleketaralyq radıasııalyq baǵdarlamasy jáne TMD memleketteri basshylary keńesiniń 2016 jylǵy 16 qyrkúıektegi TMD Ekonomıkalyq soty týraly sheshimin iske asyrýǵa qatysty qujattarǵa qol qoıyldy.
