Bul azamattar quqyǵyn qorǵaıtyn jáne memlekettik qyzmet túrlerin kórsetýde sybaılas jemqorlyq táýekelderin, ákimshilik kedergilerdi joıatyn «qoǵamdyq obýdsmender» qyzmeti elimizdegi úshinshi Mamandyrylǵan halyqqa qyzmet kórsetý ortalyǵynda ashylyp otyr. Aryzdanýshylar ombýdsmenderge ózderiniń quqyǵyn júzege asyrýda kezdesken problemalyq máselelerdi, sondaı-aq ózge de jaǵdaılardy aıtyp, suraqtaryna jaýap alýyna bolady. «Qoǵamdyq ombýdsmender» qyzmetin ashý elimizdegi Sybaılas jemqorlyqqa qarsy birinshi medıa-ortalyq pen Memlekettik qyzmet jáne sybaılas jemqorlyqqa qarsy is-qımyl agenttiginiń birlesken jobasy bolatyn. Qoǵamdyq dertke qarsy kúresti jandandyrýdy, adamdardy oǵan tózbeýge úıretýdi basty maqsat etip qoıǵan olar elmizdegi barlyq halyqqa qyzmet etý ortalyqtaryna monıtorıng júrgizip otyrady.
«Barlyq oblys ortalyqtaryndaǵy halyqqa qyzmet kórsetý ortalyqtaryna ortaq bir kemshilik bar. Olardyń barlyǵyndaǵy baǵdarlamada Memlekettik qyzmet jáne sybaılas jemqorlyqqa qarsy is-qımyl agenttiginiń departamenti men oblystyq ishki ister departamentiniń jumysy bir arnaǵa toǵystyrylmaǵan. Mysaly, kólik ıeleri tehnıkalyq tekserýden ótkendigi týraly qujatyn alyp, halyqqa qyzmet kórsetý ortalyǵyna keledi, al olardyń aty-jóni mundaǵy bazada joq bolyp shyǵady. Sodan kólik ıesi tehnıkalyq tekserý men HQO arasynda shapqylaıdy.
Bul bir shıkilik. Ekinshisi salyqqa baılanysty. Mysaly aýdannan satatyn kóliginiń salyǵyn tólegen adam Halyqqa qyzmet etý ortalyǵyna kelip mashınasyn esepten shyǵaraıyn dese, munda kompıýter ony kórsetpeıdi. Biz júrgizgen monıtorıng boıynsha, Qostanaıdaǵy problema –munda polıseıler halyqqa qyzmet kórsetý ortalyǵynyń mamandarymen bir ǵımaratta otyr. Al bul júrgizýshi kýáligin alatyn kezde oǵan qyzmet kórsetýshi eki vedomsatv qyzmetkerleriniń bir birimen baılanysýyna, odan ári sybaılastyqqa bastaıdy. Kózge uryp turǵan qubylys» deıdi Sybaılas jemqorlyqqa qarsy birinshi medıa-ortalyq tóraǵasy Tólegen Baıǵulov. Eń bastysy «Qoǵamdyq ombýdsmen» qyzmeti kórsetiletin memlekettik qyzmetti alý kezinde zańsyz «deldaldardy» aýlaqtatýǵa kúsh salatyn bolady.
Sybaılas jemqorlyqqa qarsy birinshi medıa-ortalyqtyń «Qoǵamdyq ombýdsmen» qyzmeti týraly bul bastamasy «Joldarda sybaılas jemqorlyq deńgeıin tómendetýge 10 qadam» jobasy sheńberinde júzege asyp jatyr. Qostanaıdaǵy Mamandandyrylǵan halyqqa qyzmet kórsetý ortalyǵyndaǵy «qoǵamdyq ombýdsmen» qyzmetiniń bastalýyn sapar barysynda Memlekettik qyzmet jáne sybaılas jemqorlyqqa qarsy is-qımyl agenttigi tóraǵasynyń orynbasary Alık Shpekbaev kelip kórdi. Ol tutynýshylarmen áńgimelesti, olardyń pikirin bildi.
Názıra Járimbetova
«Egemen Qazaqstan»
QOSTANAI
