Daryndy, talantty jastyń bulaq kózin ashatyn elimizdegi eń iri jobaǵa Qyzylorda oblysynan júzden asa talapker qatysyp, baǵyn synady.
Sońǵy qońyraýdyń estiler kúni Aqmeshittegi Asqar Toqmaǵambetov atyndaǵy mádenıet úıiniń ishi balanyń shat kúlkisine tolyp ketti. Saraıdyń ár jerinde tamaǵyn kenep án salyp, áýendi qubylta shyrqaǵan daýystan qulaq tunady. Barlyq bala qobaljýly. О́ıtkeni qazir sahnaǵa kóteriledi. Sonyń qortyndysy boıynsha respýblıkadaǵy mańdaıaldy baıqaýdyń fınalyna ótip, baǵyn synaıdy. О́nerpazdy úlken sahnaǵa shyǵaryp, estrada juldyzdarymen birge án shyrqaýǵa jol ashatyn osyndaı baıqaýdyń aldynda bala júreginiń atqaqtamaýy múmkin emes edi.
Syrdyń boıyn jaılaı jatqan súleıler elinde nebir talantty balalar bar. Olardy tek kórý kerek. Al «Bala daýysy» osyndaı órenderdiń baǵyn ashatyn baıqaý. Qazaqstannyń 16 qalasynda ótip, eń sońynda kil myqtynyń arasynan shyn myqtyny anyqtaıtyn saıystyń ózgelerden bási joǵary. Álııa Nazarbaeva jetekshilik etetin «Jandaný álemi» qorynyń bastamasymen ómirge kelip, búginde el arasynda úlken qoldaýǵa ıe bolyp otyrǵan baıqaýǵa Aral men Jańaqorǵannyń arasyn enshilep jatqan eldiń ónerge yntyq barsha jastary qatysty desek te bolatyndaı. Aıtpaqshy, «Bala daýysy» aldyna eshqandaı kommersııalyq maqsat qoımaǵan joba. Iаǵnı, balalardyń ústinen aqsha taýyp, jyrǵap qalýdy murat tutpaıdy. Qaıta balalar shyǵarmashylyǵyn damytyp, olarǵa barynsha qoldaý bildirip, mýzykalyq bilim alýyna keń óris ashýdy kózdeıdi.
Sonymen, Qyzylordada ótken baıqaýda Nazerke Shámbilova jeńiske jetti. 12 jastaǵy Nazerke jarysqa Baıqońyr qalasynyń atynan qatysqan. 7 jasynan bastap vokalmen aınalysqan. Sońǵy eki jylda bımen de kásibı túrde shuǵyldana bastaǵan. «Nazerkeniń ártistik qabileti óte joǵary eken. Daýysy da ádemi. О́zindik máneri bar. Ándi jaqsy sezinedi. Sahnada ózin erkin ustaıdy. Endi Nazerke ekeýmizdiń maqsatymyz da, armanymyz da ortaq. Barlyq kúsh-jigerimiz ben bilim-biligimizdi qazan aıynda «Almaty Arenada» ótetin Grand-fınaldy utýǵa arnaımyz», deıdi qyzylordalyq ónerpazdyń tálimgeri, «Alaý» tobynyń ánshisi Áset Arystanbek.
«Júzden – júırik, myńnan – tulpar» shyǵýy zańdy dúnıe. Sondyqtan qyzylordalyq ónerpazdar da Nazerkeniń jeńisine qýanyp, aldaǵy úlken jarysta sáttilik tiledi.
Erjan BAITILES,
«Egemen Qazaqstan»
QYZYLORDA
