1980 jylǵy máskeýlik jazǵy Olımpıadaǵa arnap salynǵan stadıondy jańartý sáýir aıynyń sońynda bastaldy. Qalanyń eń basty sport nysanyndaǵy qazirgi jumystar ýaqyttyń talaby jáne alda kele jatqan sporttyq sharalarǵa baılanysty. Sebebi, munda tamyz aıynyń basynda jyl saıynǵy oblystyq «Tyń-Selına – 2017» spartakıadasy men 2018 jyly Eýrazııalyq Top kásiporyndary jumyskerleriniń arasynda korporatıvtik jarystar sheńberinde II ERG spartakıadasy ótedi.
«2017 jylǵa aýqymdy jumystar josparlanǵan. Júgirý jolynda uzyndyǵy eki shaqyrymǵa jetetin tartan jabyndysy odan da sapalysyna aýystyrylýda. Budan bólek, basketbol, voleıbol alańdary men trıbýnalardaǵy barlyq oryndyqtar jańartylady. Jaıly plastıkalyq oryndyqtarǵa 1800-den astam sport jankúıeri syıyp ketedi. Alaý qurylǵysyn da jańǵyrtý josparda bar. Sebebi, olımpıadalyq alaýdy jaǵý – kez kelgen jarystyń ajyramas bóligi. Bıyl dástúr boıynsha sport atrıbýty qatysýshylardy jeńiske jetýge shabyttandyratyn bolady», deıdi «Gornıak» jastar sport klýbynyń dırektory Edgar Akopıan.
ERG óz qyzmetin bastaǵan kúnnen beri Qazaqstandaǵy salamatty ómir salty men sportty damytýǵa erekshe kóńil bólip keledi. Jyl saıyn ákimdiktermen jasalǵan áleýmettik mańyzy bar jobalardy júzege asyrý boıynsha ózara áriptestik týraly Memorandýmnyń aıasynda sport jobalaryn qoldaýǵa qomaqty qarjy bólinedi. Sońǵy bes jyldyń ózinde (2012-2016 jj.) Eýrazııalyq Top Qostanaı oblysyna 5 mlrd teńge ınvestısııa quıǵan.
«Rýdnyıdaǵy iri sport nysanyn jańartý – ERG-diń «Týǵan jer – Rodnye goroda» bastamasymen qolǵa alynǵan strategııalyq baǵytynyń jarqyn dáleli men jemisi. Ol Eýrazııalyq Top kásiporyndary ornalasqan aımaqtardy keshendi túrde damytýdy qamtamasyz etýge arnalǵan. Sonyń ishinde Qostanaı oblysy da bar. Ákimdiktermen birlesip qala turǵyndarynyń, bizdiń jumysshylardyń jaıly, ári qaýipsiz ómir súrýi úshin qoldan kelgen bar sharalardy odan ári jasaı beremiz», dedi «SSKО́B» AQ prezıdenti Bereke Muhametqalıev.
Názıra Járimbetova,
«Egemen Qazaqstan»
