Astananyń irgesindegi Qosshy aýylynda ashylǵan «Altyn taǵa» saýda kesheniniń aýmaǵy 1 650 sharshy metrdi quraıdy. Onda tek saýda pavılondary ǵana emes, veterınarlyq zerthana, qasaphana, shujyq sehy, tońazytqysh kamerasy, kókónis jáne jemis-jıdek qoımasy bar. Oǵan qosa, 2500 qoı-eshki, 300 bas iri qara men jylqy túligin qamap ustaıtyn 15 ashyq mal qora da qarastyrylǵan.
Saýda kesheni ókilderiniń aıtýynsha, mundaı bazar elimizde tek Jambyl oblysynyń Qordaı kentinde ǵana bar. «Altyn taǵa» bazarynda kókónis, jemis-jıdek, et jáne et ónimderi, balyq, sút jáne sút ónimderi, arpa, turmystyq hımııa jáne kúndelikti tutynatyn taýarlar satylady.
Shujyq sehynda et ónimderiniń súrlengen, jartylaı súrlengen tárizdi 50 túri shyǵarylady. Sehtyń qýaty táýligine 2 tonna et ónimderin quraıdy. Sondaı-aq, kókónis jáne jemis-jıdek qoımasynda 1 000 tonna ónim saqtaýǵa bolady. Qoımanyń ishi salqyndatqysh, belgili bir aýa temperatýrasyn ustap turý úshin qajetti qondyrǵylarmen jabdyqtalǵan.
Oǵan qosa, saýda ornynda syrttan kelgen saýdagerler úshin jataqhana, 100 oryndyq ashana jáne 200 kólikke arnalǵan avtoturaq qarastyrylǵan. «Altyn taǵa» bazary tas joldyń boıynda ornalasqandyqtan ári beınebaqylaý kamerasymen jabdyqtalǵandyqtan aýyl shaýashylyǵy taýarlaryn ónidirýshiler úshin óte qolaıly. Osy saýda orny arqyly elorda turǵyndary men astanalyq eldi mekenderdegi halyq sapaly ári ekologııalyq taza aýyl sharýashylyǵy ónimderin tutynatyn bolady.
