Eki júzden astam jergilikti polısııa qyzmetiniń, ákimshilik polısııanyń, tyldyq qamtamasyz etý, baılanys júıesiniń jáne shtab qyzmetkerleri –túrli marapattarǵa ıe boldy.
«Qıyn-qystaý kezeńniń alǵashqy kúninen bizdiń qyzmetkerler quqyqtyq tártipti qamtamasyz etip, óz jumystaryna adaldyqtaryn tanytty. Olardyń eren eńbegin erekshe atap ótkim keledi», dedi OIID-niń bastyǵy, polısııa general-maıory Berik Bililov.
Jyldam qımyldaıtyn arnaıy jasaqtyń qyzmetkerleriniń aǵa ýchaskelik polısııa ınspektory, polısııa podpolkovnıgi Vadım Kalının asa kúrdeli jaǵdaı qalyptasqan Bylǵary zaýytynda kúni-túni turǵyndarmen birge bolyp, kóptegen otbasylarǵa kómektesken. Ol ózge áriptesteri sekildi «Qazaqstan polısııasyna 25 jyl» medalimen marapattaldy.
«Bóget mańynda kezekshilikte júrgen ýaqytta uzyndyǵy 60 metr bolatyn qamys aralas muz aǵyp kelip, bógetti buzǵa bastady. Turǵyn úılerdi sý basyp qalmas úshin tez arada shuǵyl sharalar qabyldaýǵa týra keldi. Nátıjesinde sý kete bastaǵan jerlerdi bitep úlgerdik», - deıdi ol ótken kúnderdi eske túsirip.
Sý tasqynyna qarsy kúreske polısııa ardagerleri de óz úlesterin qosty. Ardagerler keńesi qaıyrymdylyq maqsatynda jarty mıllıon teńge qarjylaı kómek aýdardy.
Sý tasqyny kezindegi basty mindet qoǵamdyq qaýipsizdikti saqtap, quqyqtyq tártipti qamtamasyz etý jáne sý basqan jerlerde tonaý faktilerin boldyrmaý boldy. Sondaı-aq, turǵyndar men olardyń mal-múlkin evakýasııalaý jumystary da qarqyndy júrgizildi.
О́ńirde 380 úı men 500 saıajaıdy sý shaıyp ketken bolatyn.
О́mir Esqalı,
«Egemen Qazaqstan».
