«Halyq arasynda oblystyq bıýdjettiń basym bóligi fýtbolǵa, sonyń ishinde «sheteldik oıynshylarǵa jumsalady» degen narazylyq bar. Bul - óte oryndy másele. Bylaısha aıtqanda, «Bizdiń basqa sport túrlerimiz nege damymaıdy?» degen suraq týyndaıdy. Sol úshin biz árbir oblystyń ákimdigimen birigip, biryńǵaı tizimdi jasaımyz. Máselen, Shyǵys Qazaqstanda qysqy sport túrleri jaqsy damyǵan. Shańǵy, frıstaıl, budan bólek Olga Rypakovanyń jetistikterin eskere otyryp, jeńil atletıkany damytý qajet. Solardyń tizimi jasalady, oblystyq bıýdjettiń qarajaty soǵan qaraı baǵyttalady», - dedi Muxamedıuly búgin qoǵamdyq keńes aldyndaǵy esep berý kezdesýi kezinde. Mınıstrdiń aıtýynsha, Ońtústik Qazaqstan men Jambyl oblystarynda qazaqtyń ulttyq oıyndaryna negizgi basymdyq beriledi. «Buǵan deıin atalǵan óńirlerde oblystyq bıýdjetten durys aqsha bólinbeıtin edi. Jańa aıtyp jatyrmyz ǵoı, bárin fýtbolǵa jumsady. Qazir biz tizimin jasaımyz da, qaı óńirde qaı sporttyń túri jaqsy damyǵan, aqshany aldymen soǵan bóletin bolamyz», - dep atap ótti mınıstr.
