Bir kezderi bar qazaqqa astana bolǵan Qyzylorda ótken aptada qala kúnin atap ótti. Qala kúni qur dabyramen ótpedi. Bizdi osy jáıt qýantty. Osy kúni birneshe zaýyttyń lentasy qıyldy. Qıyrshyqtas shyǵaratyn, asfalt-beton óńdeıtin zaýyttar el ıgiligine berildi. Bul – jańa jumys oryndary ashylyp, jumyssyzdar sany edáýir qysqarady degen sóz. Barlyq aımaq turǵyndaryna tán bir dúnıe bar. Ol – baspana máselesi. «Berseń ber, bermeseń qoı baspanańdy», dep Qasym aqynsha jyrlap júrgenderdiń sany az emes. Mereıli mereke qarsańynda 30 otbasy jańa páterdiń tabaldyryǵynan attady.
Erjan BAITILES. Qyzylorda.
ABAI URPAQTARYN ESKE ALDY. Abaı aýdanyndaǵy Abaıdyń memlekettik qoryq-murajaıynda Aqylbaı Abaıulynyń 150 jyldyǵyna jáne Áýbákir Aqylbaıulynyń 130 jyldyǵyna arnalǵan ádebı-tanymdyq kesh ótti. Bul keshti murajaı dırektorynyń orynbasary Sh.Sadyqova ashyp, jınalǵandarǵa Abaıdyń aqyndyq mektebi jáne onyń urpaqtary jaıly aıtyp berdi. Tanymdyq keshke jınalǵandarǵa qos aqynnyń shyǵarmashylyǵy jaıly jazylǵan kitap syıǵa taratyldy. О́ner adamdary Abaı ánderi jaıly leksııa oqysa, óleńderi de jatqa aıtyldy.
Ońdasyn ELÝBAI. Shyǵys Qazaqstan oblysy.
О́ZARA TÁJIRIBE ALMASYLDY. «Nur Otan» HDP oblystyq fılıalynda oblystyq, qalalyq jáne aýdandyq sottardyń, sondaı-aq, kórshiles Reseıdiń Orynbor oblysy sottary sýdıalarynyń qatysýymen Qazaqstan táýelsizdiginiń 20 jyldyǵyna arnalǵan ǵylymı-praktıkalyq konferensııa ótkizildi. Konferensııada oblystyq sottyń tóraǵasy Erlan Aıtjanov baıandama jasap, óńirdegi sot júıesiniń búgingi tynys-tirshiliginen habardar etti. Alqaly jıynda eki eldiń sot júıesindegi ıgilikti izdenisteri men problemalary sóz boldy, ózara tájirıbe almasyldy. Shara barysynda «Aqtóbe oblysynyń soty táýelsizdik jyldarynda» atty jýrnal kópshilik nazaryna usynyldy. Konferensııaǵa qatysýshylar Alǵa aýdandyq soty men prokýratýrasynyń jańa ǵımarattarynda boldy.
Satybaldy SÁÝIRBAI. Aqtóbe oblysy.
TAÝAR О́NDIRÝShILER KО́RME-KONKÝRSY. Munaıly óńirde ótkizilgen «Atyraýdyń úzdik taýarlary» kórme-konkýrsynda ár salada taýar óndiretin 23 kásiporyn synǵa tústi. Bulardyń arasynda qurylys ındýstrııasyn, jeńil ónerkásipti órkendetýge jáne azyq-túlik qaýipsizdigin qamtamasyz etýge atsalysyp júrgender bar. О́tken aptada kórme-konkýrstyń qorytyndysymen jeńimpaz atanǵan úzdik taýar óndirýshiler anyqtaldy. «О́ndiristik maqsattaǵy úzdik taýarlar» nomınasııasynda metalplastıkalyq qondyrǵylar shyǵaratyn «Alıans SK» seriktestiginiń baǵy jandy. Al «Halyq tutynatyn úzdik taýarlar» nomınasııasynyń birinshi júldesi «О́nerpaz» seriktestigine berilse, «Úzdik azyq-túlik taýarlaryn» shyǵarýda «Injý-marjan» seriktestiginiń abyroıy asqaqtady.
Joldasbek ShО́PEǴUL. Atyraý oblysy.
KIShKENTAI NIý-IORKKE – 25 JYL. О́tken aptada bir kezderi kóp qabatty bıik turǵyn úılerden turatyn qalashyqtaryn osylaı dep ataǵan Solnechnyı kentiniń turǵyndary merekege jınaldy. О́ndiristi qalashyq ótpeli kezeń qıyndyqtaryn bastan ótkerdi. Elektr energııasyn óndiretin, bıiktigi 420 metrlik turbasy bar GRES-2 stansasy Ekibastuzdyń osy kentinde ornalasqan. Alańda Abaı eskertkishi tur. Kók kúmbezdi meshit oryn tepken. Turǵyndardy quttyqtaǵan Ekibastuz qalasynyń ákimi Aleksandr Verbnıak, stansa basshysy Ǵanı Sálimjýarov stansanyń №3 energoblok qurylysy bastalǵanyn, kenttiń ómirine úlken ózgeris kele jatqanyn atap ótti. Bul kúnderi kentte 5 myńdaı halyq turady. Elge oralǵan oralman aǵaıyndar bar. Zamanǵa saı barlyq áleýmettik nysandar jumys jasaıdy.
Farıda BYQAI. Pavlodar oblysy.
QYRYMNAN OLJALY ORALDY. Osy aımaqta ótken «Teatr. Chehov. Iаlta» halyqaralyq teatr óneriniń IV festıvali Sáken Seıfýllın atyndaǵy oblystyq qazaq drama teatry juldyzyn taǵy bir jarqyratty. 14 eldiń sahna sańlaqtary óner synasqan saıysta kórermender nazaryna usynylǵan G. Gaparova men M. Gaparovtyń «Qııamet-qaıym Kıoto» qoıylymy joǵary baǵalanyp, júldeli orynnan kórindi. Qandaı da bolsyn baıqaýlardan qalmaıtyn, odan oljasyz oralmaıtyn Qaraǵandy teatrynyń bul jańa jetistigi 80 jyldyǵy aldyndaǵy shejiresine jarqyn bet bolyp qosyldy. Tamasha tabyspen qanattanǵan qaraǵandylyq ártister bul kúnde Omby qalasynda óner kórsetýde.
Aıqyn NESIPBAI. Qaraǵandy.
BIR ǴANA MÁSELEGE ARNALDY. Oblystyq ishki saıasat basqarmasy men «Prozrenıe-Kózjetý» qoǵamdyq birlestiginiń uıymdastyrýymen «Dinı ekstremızm: máni, qaınar kózi, qazirgi jaıy» degen taqyrypta semınar ótti. Oǵan ǵalymdar, dintanýshylar, saıasatkerler, túrli uıym ókilderi qatysyp, ózderin tolǵandyrǵan problemalar jóninde oılaryn ortaǵa saldy. Basqarma bastyǵy Rýslan Álishev konfessııa jáne dinaralyq kelisimniń saqtalýyna kóńil aýdarsa, SQMÝ professory, fılosofııa ǵylymdarynyń doktory, Aleksandr Nıkıforov dinderdiń shyǵý, qazirgi taralý barysy jaıly aıtyp berdi. Basqa qatysýshylar da dinge qatysty túrli taqyryptarda baıandama jasady.
О́mir ESQALI. Soltústik Qazaqstan oblysy.
