Konferensııa jumysyn ýnıversıtet rektory, pedagogıka ǵylymdarynyń doktory Mahmetǵalı Sarybekov júrgizip otyrdy. Sondaı-aq, is-sharaǵa Qazaqstan Respýblıkasynyń memlekettik Eltańbasynyń avtory, qurmetti sáýletshi Jandarbek Málibekov, Qazaqstan Respýblıkasy Parlamenti Senatynyń depýtaty, memlekettik rámizder jónindegi respýblıkalyq komıssııanyń múshesi Tóleýbek Muqashev, oblys ákiminiń orynbasary Erqanat Manjýov jáne memlekettik organdardyń, sondaı-aq joǵary oqý oryndardyń basshylary, qoǵam qaıratkerleri men qoǵamdyq pikir kóshbasshylary, stýdentter, úkimettik emes uıymdar jetekshileri men buqaralyq aqparat quraldarynyń ókilderi qatysty.
Áýeli Memlekettik rámizder týraly arnaıy daıyndalǵan derekti fılm jurtshylyq nazaryna usynyldy. Budan keıin oblys ákiminiń orynbasary Erqanat Manjýov jınalǵan qaýymdy el rámizderiniń shırek ǵasyrlyq mereıtoıymen quttyqtady.
«Memlekettik rámizder – bul kez kelgen memlekettiń birtutastyǵyn beıneleıdi. Onyń ajyramas atrıbýttarynyń biri. Memlekettik Tý, Eltańba, Ánuran el Táýelsizdigin ǵasyrlar boıy ańsaǵan halqymyzdyń oryndalǵan armanynyń belgisi. Tuǵyry bıik táýelsizdiktiń tiregi. Azat eldiń aıshyqty sımvoly.
Dana babalarymyz artynda «Týy bıik eldiń – tuǵyry da bıik» degen ataly sóz qaldyrǵan. Halqymyz árqashanda Týyn qasterlep, bıikke kótergen. Týdy ustaýdyń jaýapty júgi jigittiń – jigitine, batyrdyń – batyryna tapsyrylǵan. Qıyn kezeńde qol bastaǵan batyrlarymyz qasıetti Týyn qulatpaı, jaýyna bermeı, janynan da joǵary qoıǵan. Bul – búgingi urpaqqa úlgi-ónege», dedi.
О́z kezeginde konferensııanyń qurmetti qonaqtary Jandarbek Málibekuly men Tóleýbek Tóleýuly sóz alyp, memlekettik rámizderdiń qalyptasýy tóńireginde áńgime qozǵady. Memlekettik rámizder qashanda eldiktiń belgisi ekenin aıtyp ótti.
Sondaı-aq, konferensııa barysynda aıtýly kúnge oraı uıymdastyrylǵan «Memlekettik rámizder – ulttyq maqtanysh» atty oblystyq jazba aqyndar baıqaýynyń jeńimpazdary men júldegerleri marapattaldy. Aqyndar saıysynyń bas júldesin M.H.Dýlatı atyndaǵy TarMÝ-diń stýdenti Janna Bahataı jeńip alsa, birinshi oryndy A.Baıtursynuly atyndaǵy gımnazııanyń muǵalimi Ásel Sháripbekqyzy ıelendi. Ekinshi oryndy M.H.Dýlatı atyndaǵy TarMÝ-diń stýdenti Bekaıdar Amanbaev enshilese, úshinshi oryn Taraz temir jol kólik kolledjiniń stýdenti Eldos Bógdikovke buıyrdy. Jas aqyndar júlde alǵan óleńderin kópshilik aldynda oqyp, qoshemetke bólendi.
Konferensııa sońy oblystyń belsendi jastarynyń Memlekettik rámizderdiń 25 jyldyǵyna arnaıy daıyndaǵan fleshmobymen jalǵasty.
Hamıt Esaman,
«Egemen Qazaqstan»
Jambyl oblysy
