Qazaq-ózbek bıznes forýmy aıasynda «GM Uzbekistan» aksıonerlik qoǵamy men «SaryarqaAvtoProm» jaýapkershiligi shekteýli seriktestigi arasyndaǵy kelisimniń qorytyndy satysyna ótý týraly habarlanǵan bolatyn. General Motors Korea mamandary júrgizgen aýdıt qorytyndysy boıynsha Qostanaıdaǵy «SaryarkaAvtoProm» zaýytynyń óndiristik alańy sapa standarttarynyń barlyq talabyna jaýap beredi. Osylaısha, О́zbekstan men Qazaqstan mashına óndirýshileri arasyndaǵy áriptestik qatynas damýdyń jańa deńgeıine kóterildi.
Ravon Nexia R3 markasy zaýyttyń qazirgi qýatynda óndiriledi. Kelisimniń kelesi satysynda avtomobıl óndirisiniń jelisi keńeıtiledi. Bıýdjettik avtomobılder arasynda Ravon Nexia R3 qazir tutynýshylar nazaryn aýdaryp otyr. Qazaqstanda quralǵandyqtan bul kólik nesıe jeńildigi bar baǵdarlamaǵa da ilinedi. 2017 jyldyń 4 aıynda qazaqstandyqtar suranymyna ıe bolý jaǵynan avtomobılder arasynda kósh bastap tur. Ol sapaly mashınanyń qoljetimdi baǵasyna da baılanysty. Mashına Qazaqstan naryǵynda kóptep satylatyn bolady.
Názıra Járimbetova
«Egemen Qazaqstan»
QOSTANAI
