OSK tóraǵasynyń atap ótkenindeı, 2017 jylǵy 28 sáýirden 28 mamyrǵa deıingi kezeńde respýblıka boıynsha Parlament Senatynyń depýtattyǵyna barlyǵy 89 kandıdat usynyldy. Buǵan deıingi – 2014 jylǵy Senatqa kezekti saılaýda 88 kandıdat, al 2011 jyly 96 kandıdat usynylǵan bolatyn.
«Osylaısha, Parlamenttiń joǵarǵy palatasynyń depýtattaryn saılaý jónindegi sońǵy úsh saılaý naýqanynda usyný qorytyndylary boıynsha bir senator mandatyna ortasha alǵanda 5 úmitkerden keledi, – dedi B.Imashev. – Osy jyly kandıdattardyń kóbi Astana qalasynan usynyldy, ol 9 adamdy, eń azy Shyǵys Qazaqstan oblysynda – 4 adamdy qurady».
Senatqa qazirgi saılaý barysynda ózin ózi usyný quqyǵyn paıdalanǵan kandıdattar sanynyń ósýi baıqalady – 82 kandıdat bolyp otyr. Sondaı-aq, ótken saılaý naýqandarymen salystyrǵanda usynýda áıelderdiń belsendiligi 2,6 ese ósken. Usynylǵan kandıdattardyń ishinde 13 áıel, onyń ishinde Astana jáne Almaty qalalarynan 7 áıel bar.
Kandıdattardyń ortasha jasy 51,9 jasty quraıdy. Eń jas kandıdat 30 jasta, úmitkerlerdiń ishindegi eń úlkeni 68 jasta. «Mamandyqtary boıynsha 26-sy ınjener, 21-i ekonomıst, 10-y oqytýshy, taǵy 10-y zańger, 9-y agrarlyq salanyń ókilderi, 5-ýi dáriger, 2-ýi saıasattanýshy jáne 6-ýy basqa mamandyq ıeleri, – dedi OSK basshysy. – О́z kandıdatýralaryn qyzmettegi 4 senator usyndy. Usynylǵandardyń ishinde 5-ýi máslıhattar depýtattary, 35-i kommersııalyq qurylymdardyń qyzmetkerleri, 13-i memlekettik uıymdar, kásiporyndar men mekemelerdiń qyzmetkerleri, 23-i memlekettik qyzmetshiler jáne 7-ýi qoǵamdyq uıymdardyń ókilderi. Qazirgi ýaqytta Senat depýtattyǵyna kandıdattardy tirkeý rásimi jalǵasýda, ol osy jyldyń 7 maýsymyna deıin jalǵasady».
Saılaý týraly zańnamaǵa sáıkes saılaý komıssııalary memlekettik organdarmen birlese otyryp, usynylǵan qujattardyń durystyǵyn tekserý boıynsha jumys júrgizýde. 28 mamyrdaǵy jaǵdaı boıynsha oblystyq, Astana jáne Almaty qalalyq saılaý komıssııalary Senat depýtattyǵyna 62 kandıdatty tirkedi. Qazirgi ýaqytta Ortalyq saılaý komıssııasyna kandıdattardan eki shaǵym kelip tústi jáne olarǵa saılaý zańnamasynyń erejelerin túsindire otyryp, jaýap berildi. Al saılaý naýqany saılaý zańnamasynyń talaptaryna sáıkes ótýde jáne Ortalyq saılaý komıssııasynyń turaqty baqylaýynda.
Álısultan QULANBAI,
«Egemen Qazaqstan»
