Aımaqtar • 30 Mamyr, 2017

Kúzet sarbazdary ant qabyldady

330 ret
kórsetildi
2 mın
oqý úshin

Almatydaǵy Qazaqstan Respýblıkasy Memlekettik kúzet qyzmeti óz qataryna jas sarbazdardy qabyldady. Saltanatty sharaǵa Almaty qalasy ákiminiń orynbasary Arman Qyryqbaev, qoǵam qaıratkerleri, Memlekettik kúzet qyzmetiniń ardagerleri, sarbazdardyń ata-analary men týystary qatysty.

Kúzet sarbazdary ant qabyldady

Áskerı qyzmet ótkerý jáne Otan aldyndaǵy konstıtýsııalyq boryshyn atqarý úshin respýblıkamyzdyń barlyq óńirlerinen shaqyrylǵan jastar saltanatty túrde  Áskerı ant qabyldady.
Rásimde jas sarbazdar qysqa merzimde alǵan mashyq-daǵdylaryn, sonyń ishinde qarýmen jáne qarýsyz ıgergen saptyq amaldardy kórsetip, saltanatty marshpen júrip ótti.  Jınalǵan qaýym MQQ Obektilerdi qorǵaý qyzmetiniń  áskerı qyzmetshileriniń sheberlikterin, kásipqoılyǵyn jáne úılesimdikterin pash etetin arnaıy qoıylymdardy tamashalady.
Sondaı-aq, Prezıdenttik úrmeli aspaptar orkestri men qurmet qaraýyl rotasy plas-konserttiń (defıle) jańa baǵdarlamasyn kórermen nazaryna usyndy.  «Temirdeı tártip pen tózimdilikke úırený er azamat úshin baǵa jetpes qasıet. Bárimiz Otan-ananyń tynyshtyǵyn kirpik qaqpaı kúzetýge tıispiz. Sizderdiń qyzmetterińiz árbir qazaqstandyq otbasynyń tynyshtyǵy men erteńgi kúnge degen senimdiliginiń kepili. Aldaǵy bir jylda jan aıamaı qyzmet etip, ulttyq namysymyzdyń týyn bıikten jelbiretińizder», dedi sarbazdardy quttyqtaý sózinde Memlekettik kúzet qyzmetiniń bastyǵy general-leıtenant Amantaı Kúreńbekov. 
Ant qabyldaý rásiminen keıin sarbazdar Qazaqstan Memlekettik kúzet qyzmetiniń Almaty men Astana qalalaryndaǵy áskerı bólimderine qyzmet etýge taratyldy. Onda olar Qazaqstan Respýblıkasynyń Tuńǵysh Prezıdenti – Elbasynyń, basqa da kúzetiletin adamdar men obektilerdiń  qaýipsizdigin qamtamasyz etý boıynsha aıryqsha mindetterdi atqaratyn dástúrli rásimderdi oryndaýǵa, sonymen qatar, Memlekettik Tý men Eltańba etalondaryn kúzetý, EKSPO-2017 halyqaralyq kórmesin ótkizýge, shetel memleketteriniń basshylaryn kútip alý rásimderine qatysatyn bolady.

Arman OKTIаBR,

«Egemen Qazaqstan»

ALMATY