1974-1992 jyldary «Egemen Qazaqstan» (burynǵy «Sosıalıstik Qazaqstan») gazetiniń Batys Qazaqstan oblysyndaǵy menshikti tilshisi bolǵan Boranǵalı Yrzabaevtyń esimi keshegi kúngi gazet oqyrmandaryna jaqsy tanys shyǵar degen oıdamyz. Borekeń qurmetti eńbek demalysyna shyqqannan keıin uzaq ómir súre almady. 1995 jyldyń 10 aqpanynda, alpys úsh jasynda, óziniń tup-týra týǵan kúninde aýyr naýqastan qaıtys boldy.
Arada eki-úsh jyl ótkennen keıin qalanyń Temir Masın kóshesindegi maıtalman jýrnalıst, Qazaqstan Jazýshylar odaǵynyń múshesi Boranǵalı Yrzabaev turǵan úıge eskertkish taqta ornatyldy. Bul naryqtyń ótpeli kezeńiniń qıynshylyǵy jan-jaqtan qursap turǵan kez bolatyn. Sondyqtan sol tusta eskertkish taqtany ýaqyt synyna tótep bere alatyn sapaly ári berik materıaldan jasaýdyń múmkindigi bolmaǵanyn da ashyq aıtýǵa týra keledi. Onyń ústine eki aralyqtaǵy jyljyp ótken jyldar, tabıǵattyń jaýyny men laısańy, shaqyraıǵan ystyq kúnder taqtadaǵy arys aǵamyzdyń beınesine syzat túsirgenin de jasyryp qala almaımyz.
Aqpannyń alaı-dúleı borandy kúnderiniń birinde dúnıege kelgendikten, áke-sheshem atymdy Boranǵalı qoıypty dep otyrýshy edi Borekeń. Iá, ol rasynda da atyna zaty saı adam edi. Jańǵyrtylǵan eskertkish taqta ózi turǵan úıge qaıtadan ornalasqan kúni de Aqjaıyq aspanyn qara bult qaptap, nóser jańbyr tógip turǵany Boranǵalı aǵamyzdyń tabıǵatymen úndestik tapqandaı.
Aldymen «Sosıalıstik Qazaqstan», keıinnen «Egemendi Qazaqstanda» dúrkin-dúrkin, kesek-kesek jarııalanyp jatatyn menshikti tilshiniń materıaldary negizinen ótkir synǵa qurylatyny da umytyla qoıǵan joq.
Sózdiń qysqasy, táýelsizdiktiń 20 jyldyǵymen tuspa-tus kelip otyrǵan bıylǵy kúzde kezinde bas basylymdaǵy azýly tilshiniń biri bolǵan Boranǵalı Yrzabaev óziniń eskertkish tuǵyryna qaıtadan kóterildi.
Temir QUSAIYN.
Oral.
Sýrette: Boranǵalı Yrzabaevtyń jańǵyrtylǵan eskertkish taqtasy osyndaı.
Sýretti túsirgen Rafhat HALELOV.
