О́tken jeksenbi kúni Aqtóbe qalasynda ótkizilgen osyndaı án saıysy «bulaq kórseń, kózin ash» degen halyq danalyǵyna qulaq qoıa bilýdiń bir belgisindeı áser qaldyrdy. Munda qaýyrsyn qanat baldyrǵandar men kishkentaılardyń tańǵy shyqtaı taza da tunyq balǵyn daýystaryn belgili ánshi Nurjan Kermenbaev baǵalady.
О́z ataýynan kórinip turǵanyndaı «Bala daýysy-2017» baıqaýyna 7-13 jas aralyǵyndaǵy balalardyń ǵana qatysa alatynyn aıtqan jón. Munda alǵashqy kezektegi basymdyq taza vokalǵa ári osy vokalǵa qoıylatyn talaptardyń álippesin baıqaýǵa qatysqan baldyrǵandardyń qanshalyqty túsinip, ony qanshalyqty deńgeıde ıgere alǵanyna baılanysty berilmek.
Qalaı degende de «Bala daýysy» baıqaýynyń baldyrǵandarǵa bereri kóp ekeni anyq. Ári buǵan deıingi ýaqytta elimizde mundaı aýqymdy jobalar qolǵa alynbaı kelgeni de shyndyq. Ulan-baıtaq elimizdiń ár óńiri men qıyrynan kelip, bolashaǵynan úlken úmit kúttiretin balalardy irikteýdiń ózi úlken gýmanıstik ról atqarady. Osynyń bárin eskere kelgende «bala daýysynyń» ǵumyry uzaq bolatynyna eshkim talas týǵyza almasa kerek.
Baıqaýdyń Aqtóbede ótken irikteý kezeńine 125 búldirshin qatysty. Qazylar alqasy olardyń arasynan Aqtóbe qalasyndaǵy №3 mýzyka mektebiniń oqýshysy Nazgúl Báımenovany jeńimpaz dep tanydy dedi gazet tilshisine baıqaýdyń menedjeri Tolǵanaı Hasen. Onyń vokalǵa beıimdiligi 5 jasynan-aq belgili bolǵan. Osy qabiletin dóp tanyǵan ata-anasy qyzynyń týabitti ónerin mýzyka mamandaryna tanystyrǵan. Irikteý kezeńiniń úzdigi týraly oǵan qazylyq jasap, baǵa bergen belgili ánshi Nurjan Kermenbaev óz oı-pikirin gazet tilshisine bylaısha jetkizdi:
– Aqtóbede ótkizilgen irikteý baıqaýy kezinde durys ta ádil tańdaý jasaý jáne fınalǵa baratyn bir ǵana balany anyqtaý shyn máninde kúrdeli boldy. Nazgúldiń vokaldyq mánerdegi daýysy erekshe ári aıyryqsha deýge bolady. Sondaı-aq, daryndy qyzdyń horeografııasy da baıqaý talabynan shyǵa bildi. Men onyń baıqaý nátıjesinde jeńiske jetýine tolyq múmkindigi bar dep esepteımin.
– Biz bul irikteý kezeńine jeńiske jetemiz degen úlken senimmen kelip edik. Oılaǵanymyz oryndaldy. Men buǵan sheksiz qýanyshtymyn. Baıqaýdy uıymdastyrýshylarǵa aıtar alǵysym sheksiz. Eń bastysy, olar balalardyń boıyndaǵy talant pen vokalǵa beıimdiligin anyqtaýǵa kásibı biliktilik turǵysynan kele bildi. Sirá, dana halqymyz «bulaq kórseń – kózin ash» dep osyndaıda aıtsa kerek, – deıdi Nazgúldiń anasy Gúlzada Báımenova.
Temir QUSAIYN,
«Egemen Qazaqstan»
AQTО́BE
Sýrette: Aqtóbedegi irikteý kezeńinen kórinis
