Elbasymyz «Halqymyzdyń áleýmettik jaǵdaıyn damytyp, azamattardyń baqýattylyǵyn arttyrýmen birge, memlekettiń irgetasy – berik otbasy, úlgili shańyraqtan bastalatynyn» qadap aıtqan bolatyn. Memleket basshysynyń bastamasymen bıyl elimizde «Mereıli otbasy» ulttyq baıqaýy tórtinshi ret ótkizilip otyr.
«Mereıli otbasy» ulttyq baıqaýynyń maqsaty bir shańyraq astynda berekeli ómir súrýdiń mańyzdylyǵyn arttyrý, otbasylyq ómir salty, ata-analyq paryz, jaýapkershilik sekildi uǵymdardy el sanasyna sińirý, ásirese, jastarǵa jetkizý, jarasymdy otbasy qundylyǵyn keńinen nasıhattaý bolyp tabylady.
«Mereıli otbasy» ulttyq baıqaýy úsh kezeńde ótti. «Mereıli otbasy» ulttyq konkýrsynyń oblystyq kezeńine aýdan, qalalardan otyzdan astam úmitker otbasylar qatysty. «Mereıli otbasy-2017» ulttyq baıqaýynyń oblystyq kezeńiniń jeńimpazy atanǵan eki otbasy Shymkent qalasynan Kanalbaı Seıilbekulynyń jáne Ordabasy aýdany Omash Shapaevtyń otbasyna Astana qalasynda ótetin respýblıkalyq baıqaýǵa joldama jáne oblys ákiminiń dıplomy men qarjylaı syılyq tapsyryldy. Qalǵan jıyrma segiz otbasyna baǵaly syılyqtar men oblys ákiminiń Alǵys haty berildi.
Bas júlde alǵan Seıilbekuly Kanalbaı otbasy týraly aıtar bolsaq, eńbek ardageri, zeınetker. Qazaq teatrynyń damýyna súbeli úles qosyp, ánshilik, aıtys, jyrshylyq, sýyrpsalma aqyndyq ónerimen elge tanylǵan mádenıettanýshy.
K.Seıilbekuly 1964 jyly Máskeýde ótken Búkilodaqtyq festıvalde Ǵ.Músirepovtiń «Qyz Jibek» spektaklinde Shegeniń, 1967 jyly Samarqan qalasynda ótken Búkilodaqtyq halyq teatry baıqaýynda B.Maılınniń «Jalbyr» spektaklinde Qaıraqbaıdyń obrazdaryn úlken sheberlikpen oryndap, laýreat atanǵan. K.Seıilbekuly Aqan seriniń, Birjan saldyń, Ǵ.Qurmanǵalıev ánderin, Bazar jyraý, Maılyqoja bıdiń termelerin halyq arasynda nasıhattap keledi. Maqtaaral aýdanynyń qurmetti azamaty 5 ul jáne 4 qyzdan 40 nemere 18 shóbere tárbıelep keledi.
Otandy súıý, onyń órkendeýine jan-júregińmen qyzmet etý ár otbasynyń ózinen, ishki mádenıetinen bastalady. Jaıshylyqta «Men Otanymdy súıemin, kerek bolsa janymdy berýge barmyn» degendi kóp jurt qyzyl sózge balaıdy. Onyń sebebi, eshkim jan suramaıtyndyqtan osylaı aıtyp úırengender de bar. Aıtý kerek boldy, aıtty. Kózge túsý kerek boldy, tústi. Qaı jaǵynan da upaı túgel.
«Mereıli otbasy» baıqaýynda oblys ákiminiń orynbasary Ulasbek Sádibekov bir jaıtty aıtqan. Onshaqty jyl burynǵy kep. Ulasbek Sádibekov ol kezde oblystyń ishki saıasat basqarmasynyń basshysy. Shardara aýdanynda ıdeologııa taqyrybynda keleli jıyn júrip jatyr. Sózge aldyn ala jazylyp qoıǵandar birinen soń biri taý sýyndaı aǵytylady. «Men Otanymdy súıemin. Barlyq qıyndyǵyna daıynmyn». Jıyn ortasynda bir keıýana sóz surapty. Bári ań-tań. Kempirdiń jalyndy patrıottyq sózder aıtpaıtyny anyq. Sonda ne aıtpaq?!
Aıtypty. 75-tegi keıýana. «Senderdiń sózderińdi baǵanadan beri tyńdap otyryp, aıtarlyqtaı úlken qyzmetimiz joq biz Otanymyzǵa ne beremiz degen oıda bolyp, jaýabyn taptym. Birinshiden, áıel-ana óz otbasynyń uıytqysy bolyp, ómirge urpaq ákelýi kerek eken. Ekinshiden, otbasy, oshaq-qasyńdy aýlańdy taza ustap ózgelerge ónege bolý kerek. Úshinshiden, qudaı qosqan kórshińmen tatý-tátti bolyp, eldiń tynyshtyǵyna, birligine qyzmet etý kerek. Bul jumystar bizdiń qolymyzdan keledi».
Aıtqan sóziniń toqeteri osy. Jany bar sóz. Kóbik sózdi kópirtkennen osy úsh otbasylyq qyzmettiń ushyǵyna jete alsań Otanyńnyń tutatqan otynyń tútini túzý shyǵaryna sene ber. Osy pikirdiń jalǵasyn júzden júırik, myńnan tulpardy marapattaǵan jıynnan soń Astanadaǵy baıqaýǵa joldama alǵan shańyraqtyń ıesi Kanalbaı Seıilbekulyna jubaıy Turǵan Seıilbekova apaıdan estidik.
– Elbasymyz Qazaqstan búgingisinen de qýatty, búgingisinen de myqty memleket bolsa dep armandap, memlekettik baǵdarlamalar jasap jatyr. Álemdegi ozyq 30 eldiń qataryna kirý úshin ekonomıkalyq ósimniń óskeni mańyzdy bolǵanymen Otanymyz adam resýrsymen, óskeleń urpaqpen myń jasaýy kerek dep oılaımyn. Erkek úıdiń egesi bolǵanda, áıel – shegesi. О́kinishke qaraı, úılene salyp ajyrasatyndar kóbeıip barady. Bul – úlken indet. Otbasyn qurdyń ba, eń aldymen sábılerińniń baqytyn oıla, tesik ókpe etpe. Ol úshin ulttyq qundylyqtary, salt-dástúrlermizdi, mádenıetimizdi saqtaýymyz kerek. Ata-baba murasyna adaldyq tanytqan jaǵdaıda qazaq otbasylary baqytqa jetedi. Áıel anaǵa eń aldymen shańyraqtyń tynyshtyǵyn oılaý kerek, – dedi ol.
Esti sóz. Bir qolymen besik, bir qolymen álemdi terbetken analar tárbıesi – ulttyń keleshegi. «Mereıli otbasy» ulttyq baıqaýynyń túıini osyndaı ulttyq qundylyqtarǵa arqa tireıdi.
Baqtııar TAIJAN,
«Egemen Qazaqstan»
Ońtústik Qazaqstan oblysy
