Kójekbaevtar áýletiniń aqsaqaly 105 jastaǵy qarııa Kúrishbek Kójekbaev pen Jarasovtar otbasynyń otaǵasy Maqsymjan Jarasov marapattaryn oblys ákiminiń orynbasary Jaqsylyq Omardyń qolynan aldy.
Oblystyq baıqaýdyń saltanatty jıynynda oblys ákiminiń orynbasary Jaqsylyq Omar quttyqtaý sóz sóıledi.
– О́z máresine jetip otyrǵan «Mereıli otbasy» baıqaýynyń oblystyq kezeńi qutty bolsyn! El irgesiniń berik ustyny sanalar árbir shańyraqqa bereke-birlik, baqyt pen shattyq tileımin! Elbasymyz Nursultan Ábishuly Nazarbaevtyń bastamasymen qolǵa alynyp otyrǵan baıqaýdyń maqsaty – otbasylyq qundylyqtardy nyǵaıtý, tatý-tátti, tárbıeli shańyraq múshelerin kópshilikke tanystyrý. El ishinde aýyldastarynyń qurmetine bólengen, ardaqty, berekeli áýletter, ónegesi mol otbasylar barshylyq. Sondyqtan jyl ótken saıyn «Mereıli otbasy» baıqaýynyń máni artyp, qatysqysy keletinderdiń qatary ulǵaıyp keledi. Mereıli otbasylardy úlgi-ónege etý arqyly óskeleń urpaqty izgilikke tárbıeleı alamyz. Búgingi baıqaý jeńimpazdaryn shyn júrekten quttyqtaımyn! – deı kele J. Omar júldegerlerdi marapattap, syı-sııapattar tapsyrdy.
I dárejeli dıplommen eki otbasy – Jambyl aýdanynan kelgen Jarasovtar men Uıǵyr aýdanynyń turǵyndary Kójekbaevtar otbasy marapattaldy.
Jarasovtar otbasy – «Jasyl el» memlekettik baǵdarlamasyn júzege asyrýǵa aýqymdy úles qosqan áýlet. Otaǵasy Maqsymjan Jarasov mıllıonnan astam aǵash otyrǵyzǵan. Memleket basshysynyń Jarlyǵymen «Qurmet» ordenin ıelenip, «Ekologııa salasynyń úzdigi» tósbelgisin alǵan. 8 balany aıaqtandyryp, 40 nemere, 21 shóbere kórip otyr. Kójekbaevtar otbasynyń da úlgisi eren. Kúrishbek Kójekbaev – Uly Otan soǵysynyń ardageri, soǵystan keıin de eldiń áleýmettik-ekonomıkalyq damýyna zor úles qosty. Birneshe memlekettik nagradalarǵa ıe bolǵan, sonyń ishinde «Qurmet» ordeni de bar. Qazirgi kezde 105 jastaǵy ardager 4 baladan 25 nemere, 30 shóbere, 15 shópshek súıip otyr.
Eki otbasy da elordada ótetin respýblıkalyq baıqaýda baq synap, oblystyń namysyn qorǵaıtyn bolady.
Ekinshi oryndy Uıǵyr aýdanynyń turǵyndary Hamraevtar otbasy men taldyqorǵandyq Myrzataevtar jáne Eskeldi aýdanynan Taıjanovtar ıelenip, 300 myń teńgeniń sertıfıkatyn aldy. Úshinshi orynǵa laıyq dep tanylǵan alakóldik Qojabekovter otbasy, Eńbekshiqazaq aýdanynan Qartbaevtar jáne Qarasaı aýdanynan kelgen Janǵuttylar otbasyna III dárejeli dıplom men 250 myń teńgeniń sertıfıkaty berildi. Bular oblystyń saýda, shyǵarmashylyq, aýyl sharýashylyǵy, áskerı qyzmet salalarynda eńbek etip júrgen ónegeli otbasylar.
Baıqaýǵa qatysqan basqa 30 otbasyna da oblys ákiminiń alǵys hattary men aqshalaı syılyqtar usynyldy.
Nurbol ÁLDIBAEV,
«Egemen Qazaqstan»
Almaty oblysy
