Aq bas Alataýdyń asqar bıiginen aqılana aqtarylǵan asaý Aqsýdyń etekte entigin basyp, jaıylyp aǵar jaǵasyndaǵy buırat qumdar arasynda buqqan aýylymyzdyń tirligi burq-sarq qaınap jatatyn. Kósheniń shańyn kóterip dop qýalaǵan qara domalaqtar oıynnyń jaǵyn aıyryp bolǵan soń aıaq sýytý úshin alańqaıǵa alqaqotan otyra qalatynbyz. Oı, sonan soń «Totynyń» toqsan tolǵaýyndaı fýtbol týraly uzaq-sonar áńgimege kirisetinbiz. Birimizden-birimiz ótken bilgishpiz. Aıtqandarymyzdyń ras-ótirigin aıyra almaısyń. Kóbinese elden estigenderimizdi kópirtemiz.
– Ataqty kommentator Vadım Sınıavskııdiń maqamymen maıyn tamyzyp, quddy radıodaǵydaı qulaq quryshyńdy qandyra reportaj júrgize alatyn Ahanbaı aǵa (belgili jýrnalıst Aıgúl Ahanbaıqyzynyń ákesi – avtor) aıtty, ilgeride KSRO men Brazılııa kezdesýinde Peleniń ońǵa-solǵa oıqastaǵan shalt qımylynan shatqaıaqtaǵan Voronın tepe-teńdikti saqtaýǵa shamasy jetpeı jalp ete qalypty...
– Almatyda «Qaırat» pen «Torpedo» oınaǵanda bizdiń Vadım Stepanov áıgili Edýard Strelsovtyń aıaǵyn tusaǵandaı adymyn ashtyrmaǵanyn Jaqsygeldi kókem óz kózimen kóripti...
– Shirkin, grýzınderdiń mańdaıǵa basar maqtanyshy Meshı men Metrevelıge jeter jampoz bar ma?!.
– Ala taqııaly aǵaıyndardyń aqbereni Berador Abdýraıymov ta eshkimge esesin jibermeıdi. Kezinde tbılısılik tarlanboz Gıvı Gavashelı ekeýi elimizdiń eń mergen shabýylshysyna beriletin «Trýd» gazetiniń arnaıy júldesin alǵanyn umyttyńdar ma?
– Áı, sender de sóıleısińder-aý, ózeýrep ózgelerdi dáriptegenshe, ózimizdiń Segizbaevty nege aıtpaısyńdar osy. Onyń oń aıaǵynyń surapyl soqqysyn ustaý múmkin bolmaǵyndyqtan qarsylastar jaǵy qaqpaǵa maımyldy qoıǵan eken.Sodan...
Tyńdaýshylaryn siltideı tyndyratyn bul ańyzdyń qalaı aıaqtalatyny bárimizge aıan. Ejelden ertegige qumar, qııaly júırik halqymyzdyń ulyqtaýǵa tatıtyn uldaryn batyrlar jyrynyń basty keıipkerlerindeı asyra beıneleýin aıypqa buıyrý, árıne, ábestik bolar. Áıteýir, adal nıetten týǵan ásireleý ekeni anyq qoı.
Al, aqıqatynda Tımýr Segizbaev sol ýaqytta KSRO birinshiliginiń joǵarǵy tobynda respýblıka namysyn qorǵaǵan «qý» jalǵyz Almatynyń «Qaıratynyń» kapıtany edi. Onyń ózindik oıyn-órnegi, teńbil doptyń búıirin tesip jibererdeı tegeýrindi tepkisi, janyndaǵy áriptesterin jeńiske jeteleıtin jeke basynyń úlgisi qandaı qurmetke de laıyq-tuǵyn. Negizinen ózge ult ókilderinen quralǵan komandalastaryn qazaqtyń qaratory jigiti jaıtańdap jasyl alańǵa bastap shyqqanda keýdelerin maqtanysh kernegenin baıyrǵy jankúıerler emirene eske alady. Ásirese, Máskeýdiń tórinde áıgili «Spartaktyń» qaqpasyna qaıqaıtyp turyp eki gol soqqanynda odaqtyq baspasózde orny bólek «Komsomolskaıa pravda» «Tımýr ı ego komanda» degen taqyryppen maqala jarııalaǵanyn búgingi jastar bile bermeýi múmkin. Almatydaǵy ortalyq stadıonnyń aldynda ornatylǵan fýtbolshy eskertkishiniń prototıpi Tımýr Segizbaev desek te qatelese qoımaspyz.
Aty ańyzǵa aınalǵan azamat keıin bapkerlikke aýysqan kezinde de ájeptáýir tabystarǵa jetti. Ol aǵa jattyqtyrýshy bolǵan tusta «Qaırat» KSRO chempıonatyndaǵy eń úzdik kórsetkishi − 7-shi oryndy ıelendi.
Bilikti maman úlken sportta úmitin úkilegen talaı talanttyń baǵyn ashty.
Máselen, tómengi toptaǵy Ashhabadtyń «Kolhozshysynan» Qurban Berdyevti shaqyryp, qaırattyq Sergeı Volgın, Evstafıı Pehlevanıdı, Vahıd Masýdov sııaqty sańlaqtardyń sapyna qosty. Kóp keshikpeı-aq túrkimenstandyq tastúlektiń tútini túzý ushyp, súıikti komandamyzdyń senim artar serkesine aınalǵany belgili. Tańǵajaıyp tehnıkasy eriksiz tańdaı qaqtyratyn. Alańdy kóre biletin, oıyndy oqı alatyn aıryqsha qabiletiniń arqasynda Davıd Kıpıanı, Horen Oganesıan, Iýrıı Gavrılov, Leonıd Býrıak syndy keńestik fýtbol juldyzdarymen teń dárejede óner kórsetti. Biraq, baby keliskenmen basqa sebepterge baılanysty bas quramaǵa alynbady. Esesine esimi Eýropaǵa málim aıtýly bapker atandy. Ol jetekshilik jasaǵan Qazannyń «Rýbıni» Reseıdiń dop dodasynda top jaryp qana qoımaı, halyqaralyq arenada azýyn aıǵa bilegen «Barselonadan» basym túskenin bilemiz.
...Nege ekeni belgisiz, qazirgi tańnyń Tımýrlary jaıynda aqıqatqa bergisiz ańyzdar aıtylmaıdy. Oda arnaýǵa laıyq ondaı oǵlandar bar-aý. Alaıda, baıaǵy bizdeı aýzyn ashyp, kózin jumyp ańyzdarǵa senetin ańqaý balalar tabyla qoıar ma eken...
Talǵat BATYRHAN,
«Egemen Qazaqstan»
