Memleket basshysyna kezdesýde Aqparat jáne kommýnıkasııalar mınıstrligi aldyna qoıylǵan mindetterdiń oryndalýy jóninde esep berildi.
Nursultan Nazarbaev memlekettik saıasattyń birqatar baǵyty boıynsha sapaly aqparattyq jumys júrgizýdiń mańyzdylyǵyn atap ótti.
– Birinshiden, aqparat quraldarynda ındýstrııalyq-ınnovasııalyq damý baǵdarlamasynyń iske asyrylýy barysyn kórsetý kerek. Ekinshiden, «Nurly Jol» ınfraqurylymdyq damý baǵdarlamasyn oryndaý jumysyn nasıhattaýdy kúsheıtý qajet. Mysaly, «Nurly jol» baǵdarlamasy men Qytaıdyń «Jańa Jibek joly» strategııasynyń ushtasýynyń oń aspektileri týraly áńgimelep berýge bolar edi. Infraqurylymdyq damý aıasynda birinshi jyly – 1600 shaqyrym, al byltyr 900 shaqyrym jol salyndy. Men ol týraly birneshe ret aıttym. Biraq buqaralyq aqparat quraldarynda bul fakt jarııa etilmedi, – dedi Qazaqstan Prezıdenti.
Sonymen qatar, Memleket basshysy Qazaqstannyń tranzıttik-kóliktik áleýetin aqparattyq turǵyda kórsetýdiń ózektiligine toqtalyp, el óńirindegi ınfraqurylymdyq jobalardyń iske asyrylýyn BAQ-ta jarııa etý qajettigin atap ótti.
Budan bólek, Nursultan Nazarbaev «Qazaqstannyń úshinshi jańǵyrýy: jahandyq básekege qabilettilik» atty joldaýdyń jáne «100 naqty qadam» Ult josparynyń negizgi erejelerin júzege asyrý úderisine aqparattyq turǵydan keńinen qoldaý kórsetý qajettigine nazar aýdardy.
Aqparat jáne kommýnıkasııalar mınıstri Qazaqstan Prezıdentine «Qazaqstannyń 100 jańa esimi» jobasynyń iske asyrylýy jáne qoǵamdyq sanany jańǵyrtýdyń barlyq baǵyty boıynsha aqparattyq-túsindirý jumystarynyń júrgizilý barysy týraly baıandady.
Memleket basshysy kezdesý qorytyndysy boıynsha birqatar naqty tapsyrma berdi.
