Balýandar básekesi bastalmas buryn Dúnıejúzilik qazaq kúresi federasııasynyń qurmetti prezıdenti Qajymqan Másimov, akademık Ǵarıfolla Esim, Olımpıada chempıony Jaqsylyq Úshkempirov, aqyn Qaıyrbek Asanov, sport jýrnalısi Nesip Júnisbaı, halyqaralyq dástúrli kúres túrleri qaýymdastyǵynyń (FILA) komıtet tóraǵasy Gentaýtas Vıleıta bastaǵan alys-jaqynnan kelgen mártebeli qonaqtar Yrǵyzbaı áýlıe kesenesinde baba rýhyna baǵyshtalǵan asqa qatysty.
Aqsýat boz kilemine eń aldymen Albert Mkrtchıan men mońǵol balýany Togýbat Batnýr shyǵyp, bul beldesýde Qap taýynyń ókili qarsylasyn bar bolǵany eki mınýt ishinde jer qaptyrdy. Bir aıta keterligi, bıyl qazaqtyń jigitteri barlyq salmaqta da des bermeı, qarsylastaryn qoǵadaı japyrdy. Jetpis kıloda Ońtústik Qazaqstan oblysynyń týmasy Qasymhan Tólenbaev qarsylas shaq keltirmese, 90 kıloda Bekzat Ahmetbekov top jardy.
Al 90 kılodan joǵary salmaqta «Qazaqstan barysy» Aıbek Nuǵymarov aqtyq synda 160 kılo tartatyn orys balýany Rústem Arsylanovty 3 mınýt shamasynda jaýyrynyn jer ıisketip, Álem kýbogynyń jeńimpazy atandy. 90 kılo salmaqtaǵy grýzın Adashashvılı Zvııa, Úndistannan kelgen Mýksın Gýatalı sekildi balýandardyń óneri de kópshiliktiń kóńilinen shyqty. Kúres kórýge jınalǵan jurt olardyń aıshylyq alys jerlerden at arytyp kelgenine ǵana emes, qazaq kúresin bir kisideı meńgergenine rızashylyqtaryn bildirip otyrdy. Beldesýden góri bıge sheber halyqtyń ókili Mýksın Gýatalı qazaq jerine alǵash ret kelgenin aıtyp, mundaı úlken jarystyń aýylda ótkenine tańǵalǵanyn da jasyrmady.
«Bizdiń elde mundaı jarystar úlken qalalarda ǵana ótedi. Ushy-qıyrsyz saıyn dala tósinde osyndaı ajarly aýyldy kórem dep múldem oılamappyn. Ulttyq taǵamdaryńyz, dástúrlerińiz qandaı keremet, halyqtyń qonaqjaılyǵyna tánti boldym», – deıdi ol.
Azamat QASYM,
«Egemen Qazaqstan»
Shyǵys Qazaqstan oblysy
Sýretterdi túsirgen Mánap MURZATAEV
