Jalǵyz qaıyq

Qarasaı – Yrǵyz aýdanyndaǵy aýyl aty. Mundaǵy turǵyndardyń kóbinese jalǵyz  qaıyqqa qarap qalatyn kezderi bolady. Negizinen kóktemgi sý tasqyny bolatyn sáýir, mamyr  aılarynda qaıyqqa degen suranys artady. О́ıtkeni qoldan amaldap jasaǵan kópirdi sý buzǵanda qýatty máshıneniń ózi Yrǵyz ózeninen ótýi múmkin bolmaı qalady. Mundaı jaǵdaı bir jarym, tipti keıde eki aıǵa deıin sozylady. Sondaıda jurt aýyl aqsaqaly Orynbasar Muhamedıevke ótinish aıtady. —  Árıne, kópir buzylǵan kezde kún saıyn aýyl turǵyndary meniń qaıyǵym  arqyly tasymaldanady dep aıta almaımyn,– deıdi qarııa. –Sebebi, qarasaılyqtar kólik qatynasynyń qıynǵa túsetin osy bir kezine ábden úırengen. Sondyqtan, bul ýaqytta aýdan men oblys ortalyǵynda qandaı da bir jumysty tyndyrýdy maqsat etpeıdi. Bar sharýany sáýir men mamyrdan basqa aılarǵa josparlaıdy. Keıde bireýlerge áldebir qujattar kerek bolyp qalady nemese mamandar Aqtóbege bilimin jetildirý maqsatynda oqýǵa barýǵa týra keledi. Sondaı kezde aýyl jastary ótinish aıtady. Osyndaı shuǵyl qajet jaǵdaılarda kómektesemiz. Aqsaqaldyń aıtýynsha, qaıyqty esip, halyqqa qyzmet kórsetýdi uly Meırambek óz mindetine alypty. Ol úshin bul azamat el-jurttan aqy almaıdy eken. — Eńbekti satýǵa bolmaıdy. Ásirese, elge qıyn kezde sol jaǵdaıdy paıdalanyp paıda tabý durys emes dep oılaımyn. «Keń bolsań, kem bolmaısyń» degen bar. Alla násip etsin deımiz, ─ deıdi Orynbasar aqsaqal. Ol aýdan, aýyl basshylary kóktemgi sý tasqynyn jiti baqylaıtyndyǵyn aıtady. Jergilikti bılik ókilderi sýdyń qansha mólsherde kelgenin, Qarasaıǵa qaraı ketip bara jatqanyn aldyn ala habarlap otyrady eken. Sonyń arqasynda aýyl turǵyndarynyń beıqam qalǵan kezi bolmapty. Ortalyqtan habar jetisimen aýyl shetindegi eki úıge kúzet kúsheıtilip, erikti jasaq daıyndalady. — Taldyq pen Yrǵyz ózenderi tasyp, sý dál Qarasaıdyń tusynda birigedi. Sodan arnasynan asqan sý aýyldyń shetine deıin jaıylady. Tipti, úılerge tym taıaý keletin kezderi de bolady. Bıyl mektepke taıaq tastam jer qalypty. Jalpy, turǵyndar kóktemgi sý tasqynyna  erte qamdanady. Úı-jaılaryn rettep bolǵan soń aýyl azamattary birlesip, qoldan kelgenshe bóget jasaıdy, — deıdi aqsaqal. Ol turǵyndardyń uıymshyl ekendigin maqtanyshpen aıtady.  Aýylda qysta otynsyz, maly jem-shópsiz qalatyn bir de bir úı joq.  О́ıtkeni turmysy tómen, jaǵdaıy nashar otbasylarǵa osyndaǵy sharýa qojalyqtary birlesip, mal azyǵy men otynyn túsirip berýdi óz mindetterine alypty. Orynbasar aqsaqal men uly Meırambektiń izgi isi súısinýge turarlyq. El-jurttyń birligin saqtap, yntymaǵyn jarastyrǵan qarttyń eńbegi men tárbıesi kópke ónege. Gúljan BAZYLQYZY. Aqtóbe oblysy, Yrǵyz aýdany.