Osy oraıda, Ulttyq sport túrleri qaýymdastyǵynyń atsalysýymen halyqaralyq kórme aıasynda halqymyzdyń etnostyq erekshelikterin nasıhattaıtyn ulttyq sport túrlerinen mańyzdy jarystar ótkizý josparlanyp otyr, dep habarlady USTQ baspasóz qyzmeti.
Osyndaǵy kórme sánin keltiretin dúbirli básekelerdiń biri – Qazaqstan Respýblıkasynyń Prezıdenti N.Nazarbaevtyń júldesine arnalǵan báıge túrlerinen EKSPO-2017 kýbogynyń ótýi. Aldaǵy 10 maýsymda ashylý saltanaty josparlanyp otyrǵan kórmeniń kelesi kúni, ıaǵnı 11 maýsymda elordadaǵy «Qazanat» atshabarynda atalǵan jarys jalaýyn kóteredi.
Alǵashqy bolyp 25 shaqyrymdyq qashyqtyqqa aýyzdyǵymen alysqan alaman báıgeniń sáıgúlikteri jiberiledi dep kútilýde. Odan keıin 2,4 jáne 1,8 shaqyrymǵa shabatyn ushqyr júırikterdiń aryny anyqtalady. Kelesi kezekte 15 shaqyrymdyq top báıge tulparlary synǵa tússe, ile-shala 7 shaqyrymdyq qunan báıgeniń bási qyzady. Sońynda kórermen qaýym taıpalǵan jorǵalar jarysyn tamashalaı alady.
– Tek bul jarystarmen shektelip qalmaımyz, – deıdi Ulttyq sport túrleri qaýymdastyǵynyń birinshi vıse-prezıdenti Erlen Ospanov. – Joǵarydaǵy jarys túrleriniń jalǵasy retinde tamyz aıynyń 11-13-i kúnderi jamby atýdan «Altyn jebe» atty halyqaralyq týrnıri ótedi. Oǵan keminde 20 memleketten sadaqshylar shaqyrylyp otyr. Bulardyń bári jamby atýdy biz bekitken ereje boıynsha oryndaıdy. Iаǵnı, álem mergenderi qazaqtyń baıyrǵy jaýyngerlik ónerimen tanysyp, at ústinde shaýyp kele jatyp nysana kózdeıdi.
– Erlen Ábilhanuly, bul jaqsy jańalyq eken. Joǵarydaǵy EKSPO-2017 kórmesi qyrkúıek aıyna deıin jalǵasady emes pe? Basqa qandaı josparlaryńyz bar?
– Jospar kóp. Atap aıtar bolsaq, tamyz aıynyń 16-18 kúnderi Astana qalasynda aýdaryspaqtan álem kýbogy jolyndaǵy halyqaralyq taǵy bir jarys ótedi. Tamyz aıynyń 20-28-i aralyǵynda kókpardan álem chempıonatyn ótkizý jaıly sheshim qabyldandy. Budan basqa qyrkúıek aıynyń basynda elordada toǵyzqumalyqtan álem birinshiligi ótedi.
– Joǵarydaǵy jarystardy ótkizý jáne uıymdastyrý isine sizderden basqa jaýapty qandaı mekeme-uıymdar bar?
– Halyqaralyq kórme aıasynda ótetin josparly jarystarǵa Mádenıet jáne sport mınıstrligi óte úlken qoldaý kórsetip otyr. Al ulttyq saıys barysyn jańadan qurylǵan Túrki halyqtarynyń dástúrli sport túrleri qaýymdastyǵy qadaǵalaıdy.
– Sońǵy jyldary dástúrli ótkizilip kele jatqan «Altyn tulpar» alaman báıgesin bıyl qaı ýaqytqa josparlap otyrsyzdar?
– Bıyl tórtinshi márte uıymdastyrylatyn 51 shaqyrymdyq «Altyn tulpar» alaman báıgesin ótkizýdi 3 qyrkúıekke josparlap qoıdyq.
Beken Qaıratuly,
«Egemen Qazaqstan»
