Bıznesti qoldaý men sanıtarlyq-epıdemıologııalyq salada qabyldanyp jatqan sharalar týrasynda jýrnalısterge áńgimelegen bas sanıtar densaýlyq saqtaý salasyndaǵy qoǵamdyq baqylaý men qadaǵalaýdyń táýekelge baǵdarlanǵan úlgisin engizý, ónimniń qaýipsizdigin bızneske qosymsha júktemesiz baqylaýǵa múmkindik beretin baqylaýdyń jańa nysandaryn engizý máselesiniń mańyzdylyǵyna mán berdi. Úkimet tapsyrmasy boıynsha bızneske qysymdy tómendetýde ruqsat etý qujattar sanynyń 81-den 7 túrge deıin qysqarǵanyn aıtty. Táýelsiz sarapshylardyń sanıtarlyq-epıdemıologııalyq aýdıt júrgizýi, kameralyq baqylaý, ónimdi ótkizý satysynda satyp alý sııaqty tekserýlerdiń sanıtarııalyq qyzmette budan buryn qoldanbaǵan balama túrleri engizilgenin jetkizdi. Sonymen qatar óndiristik baqylaý baǵdarlamalary boıynsha túsindirý jumysy jalǵasyp jatqanyn, josparlanǵan 20 sanıtarııalyq qaǵıdanyń 5-ýi qaıta bekitilgenin, komıtettiń bul boıynsha 200-ge jýyq talapty ońtaılandyryp, eskirgen 124 talapty alyp tastaǵanyn jýrnalıster qaperine saldy.
Sanıtarlyq-epıdemıologııa máselelerinde tekserýler sanyn qysqartýdaǵy tájirıbeni eskere otyryp, táýekelderdi baǵalaýdyń jańa ólshemsharttaryn ázirleý qajet bolǵanyn aıtqan ol sondaı jumystyń arqasynda epıdemııalyq mańyzdy obektiler tizbesin qalyptastyrýǵa arnalǵan tásildi qaıta qaraýda erekshe tártip boıynsha baqylaý men qadaǵalaýǵa jatatyn obektilerdiń sanyn 60 paıyzǵa nemese 26 myń obektige qysqartýǵa múmkindik týǵanyn jetkizdi.
Sondaı-aq, J. Bekshın «Qaıta retteý» jobasy sheńberinde júrgizilip jatqan sanıtarlyq qaǵıdalardyń talaptaryn ońtaılandyrýdaǵy jumystar týraly aıtty. Onyń qorytyndysy boıynsha sanıtarlyq qaǵıdalardyń sany 10 esege, ıaǵnı 700-den 67-ge túsip, ondaǵy talaptar sany qazirgi ýaqytta 11 myńnan 4 myńǵa deıin qysqartylǵan.
Ońtaılandyrylǵan sanıtarlyq qaǵıdalardy qabyldaý kásipkerlerdiń jaýapkershiligin arttyrýmen qosa halyqqa qyzmet kórsetý sapasyn jaqsartýǵa, jeke sektordy damytýda ákimshilik kedergilerdi alýǵa jol ashyp, memleket-jekemenshik áriptestigi, onyń ishinde densaýlyq saqtaý jáne bilim berý salalaryndaǵy jobalardy iske asyrýǵa bıznestiń qoljetimdiligin arttyra túsedi degen oıymen bólisti. Mundaı qadamdar kásipkerlerdiń básekege qabilettiligin arttyrýǵa jáne ónimniń sapasyn jaqsarta túsýge degen yntasyn joǵarylatýǵa múmkindik beredi degen ol bıznesti qaıta retteýde memlekettiń, kásipkerlik pen tutynýshylar múddeleriniń teńgeriminiń saqtalýyna qol jetkizilip, halyqtyń qaýipsizdik jáne jaılylyq deńgeıine esh nuqsan kelmeıtinin aıtty.
«Egemen-aqparat»
